Թուրքական Doğan լրատվական գործակալության փոխանցմամբ` Իգդիրի նահանգի Հալֆելի գյուղում ծնվել է երեք ոտք ունեցող հորթ: Վերջինիս մոտ բացակայում է դիմացի աջ ոտքը: Դա զարմացրել է տեղի գյուղացիներին, որոնք նշել են, որ առաջին անգամ են հանդիպում նման տեսարանի:
Հիշեցնենք, որ TÜRKSAM միջազգային հարաբերությունների և ռազմավարական հետազոտությունների կենտրոնի նախագահ, «Ազգայնական շարժում» կուսակցության (ԱՇԿ) պատգամավոր
Սինան Օղանը նախկինում օգտվել էր նմանատիպ դեպքից, երբ Իգդիրում ծնվել էր մարդու գլխով հորթ, և դա ծառայեցրել էր Մեծամորի ատոմակայանի վնասակար ազդեցության մասին բարձրաձայնելու համար՝ ընդգծելով, որ հենց դրա պատճառով են Իգդիրում ծնվում խեղված կենդանիներ ու մարդիկ:
Սինան Օղանը ծնվել է հենց Իգդիրում, ուր առկա է մեծաթիվ ադրբեջանական բնակչություն (որոշ տվյալներով՝ մինչև 70 տոկոսը): Նա բազմիցս Մեծամորի ատոմակայանն անվանել է «Հայկական Չեռնոբիլ և Եվրոպայի ամենավտանգավոր ատոմակայան»: Հայ-թուրքական սահմանի բացման հետ կապված՝ Սինան Օղանը հայտարարել է, որ դա ոչ միայն «որևէ օգուտ չի տա» Իգդիրին, այլև «վերջ կդնի» Իգդիրի գյուղատնտեսությանն ու անասնապահությանը:
