Այսօր Հայաստանում ՆԱՏՕ-ի տեղեկատվական կենտրոնը կազմակերպել էր մեր երկրում Մեծ Բրիտանիայի դեսպան Չարլզ Լոնդեյլի հանդիպումը լրագրողների հետ: Ի դեպ, աս առաջին միջոցառումն է հունվարի 1-ից շահագործվող ՆԱՏՕ-ի նոր կենտրոնում, որի կառուցումը հովանավորել է բրիտանական դեսպանատունը: Հանդիպմանը հիմանական թեման 2010թ.-ի նոյեմբերի 19-20-ին Լիսաբոնում կայացած ՆԱՏՕ-ի գագաթնաժողովում ընդունված Ռազմավարական հայեցակարգն էր, և դրա նշանակությունը հատկապես ՆԱՏՕ-Հայաստան համագործակցության վրա: Ըստ Մեծ Բրիտանիայի դեսպանի` նոր հայեցակարգը շատ կարևոր է, քանի որ այն ուղենշում է ՆԱՏՕ-ի գալիք 10 տարվա գործողությունները, ինչպես նաև ծրագրում է որոշ փոփոխություններ ՆԱՏՕ-ի ռազմավարության մեջ: Խոսելով ՆԱՏՕ-Հայաստան համագործակցությունից` դեսպան Չարլզ Լոնդեյլը ասաց. «Մենք բարձր ենք գնահատում Հայաստանի մասնակցությունը ՆԱՏՕ-ի նախաձեռնած խաղաղապահ գործողություններին: Ժամանակին Հայաստանը մեծ ուժեր է ուղարկել Իրաք, Կոսովո և իհարկե, Աֆղանստան»: Դեսպանը նաև հույս հայտնեց, որ ապագայում Հայաստանը էլ ավելի ակտիվ կհամագործակցի ՆԱՏՕ-ի հետ:
