Ապրիլի 2-4-ը Բաքվում Էներգետիկ անվտանգության հանձնաժողովում ընդունված զեկույցում ոչ միայն հայկական ատոմակայանի փակման պահանջ չդրվեց, այլև ողջույնի խոսքեր հայտնեցին ԱԷԿ-ում նախատեսվող սթրես-թեստի անցկացման վերաբերյալ: Այս մասին այսօր լրագրողների հետ հանդիպմանը ներկայացնելով «Եվրանեսթ» ԽՎ-ի արդյունքները՝ հայտնեց հայկական պատվիրակության անդամ, պատգամավոր Ստեփան Սաֆարյանը` հիշեցնելով, որ հայկական ատոմակայանի փակման հարցը փորձում էին բարձրացնել «Եվրանեսթ»-ի նախորդ նիստի ժամանակ:
Ս. Սաֆարյանի խոսքով՝ դեռ Թբիլիսիում ԵԺԿ քաղաքական ընտանիքին էր ներկայացվել փակ սահմանների խնդիրը, որի միջոցով Ադրբեջանը արհեստականորեն բարձրացնում էր էներգետիկ ցանցերի արժեքը: Պատգամավորի բնորոշմամբ` իրենք ձեռնոց նետեցին ադրբեջանական կողմին, որը արտահանում է նավթ, մինչդեռ աշխարհը գնում է դեպի վերականգնվող էներգետիկա:
«Եվրանեսթ» ԽՎ-ի հայկական պատվիրակության ղեկավար Վահան Հովհաննիսյանը հայտնեց, որ Արտակ Զաքարյանի գլխավորած հանձնաժողովում «ճակատամարտ» է տեղի ունեցել ադրբեջանական հասարակական հատվածի և գործադիր իշխանությունների միջև` մարդու իրավունքների ոտնահարման հողի վրա: Այս հատվածի հետաքրքիր մանրամասները Ա. Զաքարյանը առանձին կներկայացնի լրատվամիջոցներին:
«Դա ապացուցում է որ ադրբեջանական հասարակությունն ապրում է լրիվ ուրիշ իղձերով, քան փորձ է արվում ներկայացնել միջազգային հանրությանը»,- նշեց Վ. Հովհաննիսյանը:
Հայկական պատվիրակության անդամ Լիլիթ Գալստյանը նշեց, որ ի տարբերություն Ալիևի` Մեջլիսի անդամները խոսում էին փոխզիջման մասին, ընդ որում՝ «փոխզիջում» արտահայտությունն օգտագործելով առաջին անգամ. «Իրական ժողովրդական մակարդակում երկխոսության պահանջը ավելի մեծ է, քան Ալիևը ներկայացնում է»:
Ն. Զոհրաբյանի բնորոշմամբ` «մեկ մարդու, մեկ կլանի քաղաքականություն է», և անկախ նրանից, թե ինչի մասին է խոսքը, ադրբեջանցիներն ունեն փաթեթ` 20% օկուպացիա, մեկ միլիոն փախստականներ, սակայն հայկական հակափաստարկներին նրանք պատասխան չեն գտնում:
