Ուկրաինայի նախկին վարչապետ Յուլյա Տիմոշենկոյի զինակից, Խարկովի նախկին նահանգապետ Արսեն Ավակովը դեռ երկար կմնա Իտալիայում: Այս մասին հայտարարել է ուկրաինացի պատգամավոր, Ուկրաինայում «Ինտերպոլի» նախկին ղեկավար Կիրիլ Կուլիկովը: Այս մասին հայտնում է comments.ua-ը:
Նրա խոսքով` հանցագործների արտահանձնման միջազգային գործընթացները բավական երկար են տևում:
«40 օրում Ուկրաինայի գլխավոր դատախազությունը պետք է հավաքի բոլոր նյութերը` կապված Ավակովի գործի հետ, դրանք թարգմանի իտալերեն, հաստատի նոտարով, սահմանված կարգով նախապատրաստի ու ուղարկի տեղական դատարան: Ու միայն այդ ժամանակ դատարանը կորոշի` կա՞ն արդյոք իրավական հիմքեր նրան արտահանձնելու համար»,- բացատրել է Կուլիկովը:
Ընդ որում, մեկնաբանելով Ավակովի կողմից քաղաքական փախստականի կարգավիճակի ձեռքբերման հնարավորությունը՝ նա նկատել է, որ դրա համար հարկավոր է հենց ձերբակալվածի ցանկությունը: «Ինչ վերաբերում է Ավակովին, ապա մենք դեռ չենք խոսում նրա մասին` որպես քաղաքական փախստականի: Անձամբ Ավակովը, որքան գիտեմ, այդ մասին չի հայտարարել: Միայն այն բանից հետո, երբ լուծվի նրա արտահաձնման հարցը, կարող է քննարկվել քաղաքական փախստականի կարգավիճակի հարցը, և դա կլինի միան Արսեն Ավակովի ընտրությունը: Ընդ որում՝ իտալալական իշխանությունների ցանկացած պատասխան` թե՛ դրական ու թե՛ բացասական, կարելի է բողոքարկել»,- ընդգծել է պատգամավորը` հավելելով, թե այս ամբողջ ժամանակահատվածում Ավակովը պետք է գտնվի Իտալիայում:
Հիշեցնենք, որ 2010թ. փետրվարի 9-ին` Ուկրաինայի նախագահական ընտրություններում Վիկտոր Յանուկովիչի հաղթանակից 2 օր անց նա հրաժարական տվեց Խարկովի նահանգապետի պաշտոնից:
Ուկրաինական իշխանությունները Ավակովի նկատմամբ հայտարարել են միջազգային հետախուզում` մեղադրելով նրան ծառայողական պարտականությունների չարաշահման մեջ: Նրա նկատմամբ հարուցվել է 2 քրեական գործ` կապված հողատարածքների անօրիանական սեփականաշնորհման հետ: Կալանավորումից անմիջապես հետո Կիևը պահանջել է նրան արտահանձնել։ Միաժամանակ Տիմոշենկոյի կուսակցությունը դիմել է Իտալիայի կառավարությանն ու «Ինտերպոլին»` խնդրելով չհանձնել նրան Ուկրաինայի իշխանություններին, քանի որ այդ պարագայում նա կդառնա երկրի իշխանությունների և նախագահ Վիկտոր Յանուկովիչի հերթական զոհը: Ներկայումս ուկրաինացի քաղաքական գործիչը Ֆրոզինոնեի բանտում է։
