«Եվրանեսթ» ԽՎ-ի ՀՀ ԱԺ պատվիրակության ղեկավար Վահան Հովհաննիսյանն այսօր ասուլիսի ժամանակ դրական գնահատեց Բաքվում ապրիլի 2-4-ը կայացած «Եվրանեսթ»-ի լիագումար նիստի աշխատանքները՝ հայտնելով, որ այս նիստի ժամանակ համաձայնություն է ձեռք բերվել, և բանաձևեր են ընդունվել, ինչը չէր հաջողվել առաջին նիստի ժամանակ։
«Ադրբեջանական պատվիրակությունը բավականին կառուցողական էր տրամադրված, և առաջին օրը չհիշատակվեց ո՛չ կոնֆլիկտը, ո՛չ ԼՂ-ն: Մյուս օրը, սակայն, ողջույնի խոսքում նախագահ Ալիևը իր ճառի մեջ ագրեսիվ, անընդունելի հակահայկական շեշտադրումներ դրեց` օգտագործելով «ֆաշիզմ», «պղծված գերեզմաններ» արտահայտությունները, որոնք մինչև հիմա չէին հնչել, և դա սառը ցնցուղ էր «Եվրանեսթի» համար և շատ վատ տպավորություն թողեց եվրոպական ներկայացուցիչների մոտ»:
Վ. Հովհաննիսյանը հայտնեց, որ այդ ելույթից հետո նույնիսկ որոշ ադրբեջանական պատվիրակներ մոտեցել են իրենց և ներողություն խնդրել:
Ի պատասխան` ՀՀ պատվիրակության անդամները հայտարարություն և դրան կից բացատրական նյութ են տարածել: Վ. Հովհաննիսյանի բնորոշմամբ` պատգամավորներ Լիլիթ Գալստյանի, Նաիրա Զոհրաբյանի և Ստյոպա Սաֆարյանի ելույթները ջախջախիչ հարված հասցրին: Նա նշեց, որ Ալիևի ելույթից հետո էլ աշխատանքը շարունակվել է բավականին կառուցողական ձևով:
«Գնալն անպայման պետք էր: Ալիևը, գուցե չցանկանալով, այնպիսի հարված հասցրեց իրենց իմիջին, որ մենք չէինք պատկերացնում»,- ասաց Վ. Հովհաննիսյանը:
Միաժամանակ, փորձ էր արվել հայկական պատվիրակությանը մեկուսացնել մամուլից, թեև ադրբեջանական մի հեռուստաընկերությանը Հովհաննիսյանը հարցազրույց տվել է: Վ. Հովհաննիսյանը նաև նշեց, որ Բաքվում շրջելու ընթացքում հայերի հանդեպ ժողովրդի կողմից ոչ մի ագրեսիվ տրամադրություն չեն նկատել:
