Ինչպես տեղեկացնում է CNN-ը, ԱՄՆ նախագահ Բարաք Օբաման Վաշինգտոնում պաշտոնական այցով գտնվող Չինաստանի նախագահ Հու Ձին Թաոյի հետ մամուլի ասուլիսի ժամանակ հայտարարել է, որ ստորագրվել են երկկողմ պայմանագրեր, որոնք թույլ կտան ավելացնել արտահանումը Միացյալ Նահանգներից Չինաստան 45 մլրդ դոլարով: Այս պայմանագրերը նաև թույլ են տալիս ամերիկյան տնտեսության մեջ մի քանի մլրդ դոլարով ավելացնել չինական ներդրումները: Ըստ Օբամայի՝ այն ոլորտները, որոնք հիմնականում ընդգրկված են այս պայմանագրերում, վերաբերում են գյուղատնտեսությանը, մեքենաշինությանը և ծրագրավորմանը: Հայտնի է դարձել, որ Boeing ընկերությունը մոտ 200 ինքնաթիռ է վաճառելու Չինաստանի ավիաընկերություններին: Այդ գործարքի գինը կազմել է 19 մլրդ դոլար: Այս պայմանագրերի շնորհիվ աշխատատեղերն ԱՄՆ-ում կավելանան 235 հազարով:
Կողմերը նաև համաձայնության են եկել, որ ամերիկյան ընկերությունները ճնշումների չեն ենթարկվի Չինաստանում և կունենան ազատ գործելու իրավունք: Կողմերը քննարկել են նաև իրավիճակը Կորեական թերակղզում, Հյուսիսային Կորեայի միջուկային ծրագիրը, ինչպես նաև մի շարք հարցեր, որոնք վերաբերում էին Չինաստանում մարդու իրավունքների ոտնահարմանը: