Ամերիկահայերի Asparez թերթի փոխանցմամբ՝ Լոս Անջելեսում գտնվող Թուրքիայի գլխավոր հյուպատոսարանը նախաձեռնել է հայերի ու թուրքերի միջև «բարեկամական հարաբերությունների» ստեղծման կամպանիա: Նրանք նաև ԱՄՆ-ի հայ համայնքին կոչ են արել միանալ այդ նախաձեռնությանը:
Ուշագրավ է, որ Թուրքիայի հյուպատոսությունը ձգտում է իր նախաձեռնության մեջ ներգրավել հայ համայնքի ղեկավարներին, ազդեցիկ հայ գործարարներին և համայնքի այլ հեղինակավոր ներկայացուցիչների:
Թերթը գրում է, որ սա հիրավի վտանգավոր նախաձեռնություն է, որի արմատները տանում են դեպի Թուրքիայի արտաքին քաղաքականություն: Կասկած է հարուցում նաև այս նախաձեռնության ժամկետի ընտրությունը՝ Հայոց ցեղասպանության տարելիցի նախաշեմին:
Թուրքիան ամեն ինչ անում է իր այդ գործած հանցագործությունը քողարկելու համար՝ դրանում ներքաշելով ԱՄՆ-ի հայ համայնքին: Հայերի հետ կապեր հաստատելու նպատակով նա օգտագործում է իր բոլոր կապերն ու լծակները:
Թերթը կարծում է, որ Հայաստանի ԱԳՆ-ն, Վաշինգտոնում գտնվող Հայաստանի դեսպանատունը և Լոս Անջելեսում գտնվող հյուպատոսությունը պետք է արձագանքեն թուրքական այս նախաձեռնությանը և նվազագույնի հասցնեն թուրքական կողմի գործողությունները, քանի որ դրանք սպառնում են ԱՄՆ-ի հայ համայնքի փլուզմանը:
