Այսօր Կոտայքի մարզի ընդհանուր իրավասության դատարանում սկսվել է 2010 թ. հունիսի 5-ին Չարենցավանի թիվ 5 դպրոցում վիճաբանության հետևանքով մահացած տասնամյա Դերենիկ Գասպարյանի քրեական գործի վարույթը կարճելու դեմ բերած տուժողի իրավահաջորդի ներկայացուցիչ Արայիկ Զալյանի բողոքի քննությունը: Հիշեցնենք, որ Դերենիկ Գասպարյանի մահվան հետ կապված քրեական գործը հարուցվել էր 46 օր ուշացումով և ոչ թե մահվան փաստի առթիվ, այլ` «մինչև մահը հասցված թեթև վնասի հատկանիշներ չպարունակող մարմնական վնասի հատկանիշներով»: Պատահարը տեղի է ունեցել դպրոցում, քննության ժամանակ, երբ չորրորդ դասարանցի Դերենիկը ծեծի է ենթարկվել համադասարանցիների կողմից, իսկ դպրոցի ադմինիստրացիան միջոցներ չի ձեռնարկել այն կանխելու համար: Ծեծի հետևանքով երեխան մահացել է: Դերենիկ Գասպարյանի իրավահաջորդի ներկայացուցիչ Արայիկ Զալյանը «Առաջին լրատվական»-ի հետ զրույցում նշեց, որ դատական նիստի ժամանակ ինքը ներկայացրել է միջնորդություն քրեական գործի նյութերը տրամադրելու վերաբերյալ: Ըստ այդ միջնորդության, նախաքննական մարմինը պետք է քրեական գործի նյութերը տրամադրի դատարանին և տուժողի իրավահաջորդի ներկայացուցչին: Դատարանը, ըստ Արայիկ Զալյանի, բավարարել է միջնորդությունը: Իսկ հաջորդ դատական նիստը նշանակված է փետրվարի 11-ին:
