Իտալացի նկարիչ Կարավաջոն կարող էր մահանալ դանակի հարվածից առաջացած վերքից, այլ ոչ թե հիվանդությունից, ինչպես ենթադրվում էր նախկինում: Նման եզրահանգման է եկել նեապոլցի պատմաբան Վինչենցո Պաչելլին, ով կարողացել է գտնել հազվագյուտ փաստաթղթեր Հռոմի և Վատիկանի գաղտնի արխիվներում: Այս մասին գրել է La Reppublica-ն:
Որոշ պատմաբաններ ենթադրում են, որ Կարավաջոն մահացել է մալարիայից՝ 1610 թ., և թաղվել է Պորտո-Էրկոլե քաղաքում, որտեղ հայտնվել է Նեապոլից Հռոմ գնալու ճանապարհին:
Կարավաջոյին 1606 թ. մեղադրում են սպանության մեջ, որից հետո նա սկսում է թափառել: Իմանալով, որ կարդինալն իրեն ներում է շնորհել` Կարավաջոն վերադառնում է Հռոմ: Սակայն նկարիչն այդպես էլ Հռոմ չի հասնում. ճանապարհին նա հիվանդանում և մեռնում է:
Պաչելլիի կարծիքով՝ Կարավաջոն մահացել է Պալո քաղաքում այն բանից հետո, երբ նրա վրա հարձակվել են Մալթայի ասպետները, քանի որ նկարիչն անհարգալից է վերաբերվել Մալթայի հայտնի ասպետներից մեկի հանդեպ: Ըստ պատմաբանի՝ նկարչի մարմինը գցել են ծովը: Հենց այս հանգամանքով է պայմանավորված, որ Կարավաջոյի մահվան վերաբերյալ որևէ փաստաթուղթ չկա։
Պաչելլիի այս տեսակետը կասկածներ է առաջացնում մի շարք պատմաբանների, այդ թվում՝ Վիրջինիայից ամերիկացի պատմաբան Ջոն Սփայքի մոտ: Ըստ պատմաբանի՝ մալթացի ասպետները Կարավաջոյին կսպանեին միանգամից, այլ ոչ թե կսպասեին մի քանի տարի:
