Այսօր Սերբիայում ելույթ կունենա երկրի նախագահ Բորիս Տադիչը, որը, ինչպես սպասվում է, կհայտարարի իր հրաժարականի մասին: Այս մասին հաղորդում է B92 ռադիոկայանը:
Գործող մանդատի համաձայն՝ Տադիչի լիազորությունների ժամկետը լրանում է միայն 2012 թ. վերջին: Նախագահի՝ նման քայլի դիմելու նպատակը արտահերթ ընտրությունների անցկացումն է:
Իրադարձությունների նման զարգացումը հնարավորություն կտա Սերբիայի խորհրդարանի խոսնակ Սալվիցա Ջուկիչ-Դեյանովիչին (որը նախագահի հրաժարականի դեպքում ստանում է նախագահական լիազորություններ) պետութան նախագահի ընտրությունների օրը նշանակել մայիսի 6-ին: Ուշագրավ է, որ մեկ ամիս առաջ հենց այդ օրը նախատեսվում էին խորհրդարանական և տեղական ինքնակառավարման մարմինների ընտրություններ:
Լիազորությունները վաղաժամ ցած դնելու որոշումը Տադիչը կապում է ընտրությունների համար անհրաժեշտ բյուջետային միջոցները խնայելու ցանկության հետ: Այդ մասին նա տեղեկացրել է համակուսակից-դեմոկրատներին:
Որոշ քաղաքագետներ կարծում են, որ նման քայլով նա ցանկանում է օգնել Դեմոկրատական կուսակցությանը լրացուցիչ էլեկտորատ հավաքել. սոցհարցումների տվյալներով՝ այժմ այն զիջում է ընդդիմադիր Սերբիայի առաջադիմական կուսակցությանը:
Ակնկալվում է, որ Տադիչը կմասնակցի առաջիկա ընտրություններին, նրա գլխավոր հակառակորդը կլինի Տոմիսլավ Նիկոլիչը:
