Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը նոյեմբերի 9-10-ը մասնակցելու է Եվրահանձնաժողովի նախաձեռնությամբ Երեւանում կայանալիք ԵՄ-Հայաստան քաղաքացիական հասարակության սեմինարին` նվիրված մարդկանց արդար դատավարության իրավունքին եւ դատական մարմինների անկախությանը: Արթուր Սաքունցից հետաքրքրվեցինք, թե ինչ հարցեր է պատրաստվում նա արծարծել սեմինարի ժամանակ: «Անդրադառնալու եմ արդար դատաքննության իրավունքի խնդիրներին, քաղաքական բանտարկյալների դատավարություններին, դատական համակարգի կախյալ վիճակին», – նշեց մեր զրուցակիցը: Իրավապաշտպանից, որը նաեւ Քրեակատարողական հիմնարկներում հասարակական դիտորդական խմբի ղեկավարն է, փորձեցինք տեղեկանալ, թե վերջին շրջանում ՔԿՀ-ներ կատարած իր այցերի ժամանակ մարդու իրավունքների խախտման ինչ նոր դեպքերի է ականատես եղել, որոնց նա մինչ այդ չէր հանդիպել` որպես հասարակական կազմակերպության ղեկավար: Արթուր Սաքունցի դիտարկումներով, ՔԿՀ-ներում իրենց պատիժը կրող դատապարտյալները մեծ մասամբ դժգոհում են հանցանքին ոչ համարժեք պատժի սահմանումից, պայմանական-վաղաժամկետ ազատման համակարգից: