Այսօրվա հերթական նիստում ՀՀ կենտրոնական ընտրական հանձնաժողովը համամասնական ընտրակարգով ընտրություններին մասնակցող կուսակցությունների միջև էլեկտրոնային վիճակահանությամբ բաշխել է հինգ քառակուսի մետրը գերազանցող արտաքին գովազդային վահանակներում քարոզչական պաստառներ փակցնելու իրավունքը:
Այդ գովազդային վահանակներում քարոզչական պաստառներ տեղադրելու համար ՀՀ կենտրոնական ընտրական հանձնաժողով նախապես հայտեր էին ներկայացրել «Հայաստանի Հանրապետական», «ժառանգություն», «Օրինաց Երկիր», «Հայ Յեղափոխական Դաշնակցություն» և «Բարգավաճ Հայաստան» կուսակցությունները:
Նիստի ընթացքում ՀՀ կենտրոնական ընտրական հանձնաժողովը մերժել է ,Մարդ և իրավունք» իրավապաշտպան, «ԵՔԳԱ» երիտասարդական և «Մեղրու կանանց ռեսուրս կենտրոն» հասարակական կազմակերպությունների դիտորդների հավատարմագրման մասին դիմումները, քանի որ նշված կազմակերպությունների կանոնադրական խնդիրները չեն ներառում ժողովրդավարության և մարդու իրավունքների պաշտպանության հարցեր:
