Թուրքական Haberler.Com կայքի փոխանցմամբ՝ Թուրքիայի վարչապետ Ռեջեփ Էրդողանն իր գլխավորած «Արդարություն ու զարգացում» կուսակցության (ԱԶԿ) ամենշաբաթյա նիստում անդրադարձել է Իրանի միջուկային ծրագրի և Սիրիայի խնդիրներին.
«Մենք հանդես ենք գալիս միջուկային զենքի հարցում երկրների նկատմամբ անհավասարաչափ մոտեցման ու երկակի ստանդարտների կիրառման դեմ: Նախորդ շաբաք մենք մեր այդ դիրքորոշումը հայտնեցինք Հարավային Կորեայում:
Մենք ողջունում ենք խաղաղ նպատակներով միջուկային էներգիայի գործածումը և դեմ ենք հանդես գալիս տվյալ հարցում խոչընդոտներ հարուցելուն: Ներկայիս դրությամբ Իսրայելում առկա է բավական շատ քիմիական զենք: Մենք սովոր չենք, որ այլ երկրներն աչք են փակում Իսրայելի միջուկային զենքի վրա: Դա խտրականություն է: Մենք մեր այդ կարծիքը հայտնել ենք նաև Իրանում:
Ստամբուլում «Սիրիայի բարեկամներ» խմբի գագաթնաժողովում հաստատվեց, որ Բաշար Ասադը գազանաբար է վերաբերվում իր ժողովրդին: Ամեն օր Սիրիայում մարդիկ են զոհվում: ՄԱԿ–ի ԱԽ-ն պետք է բանաձև ընդունի այդ կապակցությամբ: Սիրիայում միլիոնավոր մարդիկ զգում են մարդասիրական օգնության կարիք: Սիրիայից մեր երկիր են գաղթել մոտ 20,000, իսկ դեպի Հորդանան՝ մոտ 90,000 փախստականներ:
Մենք պայքարելու ենք մարդասիրական օգնության ուղարկման համար: Մենք Սիրիայի ժողովրդին խոստացել ենք, որ միայնակ չենք թողնելու նրան: Մենք ինտենսիվորեն աշխատում ենք Սիրիայում գտնվող մեր լրագրողներին ազատ արձակելու ուղղությամբ»:
