Հայտնի է, որ ԱԺ պատգամավոր-օլիգարխներ Սամվել Ալեքսանյանը, Լևոն Սարգսյանը և Ռուբեն Հայրապետյանը, որոնք հանրությանն առավել հայտնի են իրենց Լֆիկ Սամո, Ալրաղացի Լյովիկ և Նեմեց Ռուբո մականուններով, դատի են տվել «Հայկական ժամանակ» օրաթերթին: Նրանք պահանջում են հերքել անցյալ տարի հոկտեմբերի 14-ին թերթում հրապարակված նյութը, ըստ որի` ՌԴ իրավապահները կազմել և Մոսկվայում գործող «Միաբանություն» հայկական ազգային ակումբի նախագահ Սմբատ Կարախանյանի հետ քննարկել են մի ցուցակ, որում ընդգրկված են ռուս իրավապահների քննած քրեական գործերում շրջանառվող ՀՀ պաշտոնյաների և օլիգարխների, այդ թվում` վերը նշված երեքի անունները: «Հայկական ժամանակ» օրաթերթի իրավական թեմաներով գրող լրագրող Վահագն Հովակիմյանը «Առաջին լրատվական»-ի հետ զրույցում նշեց, որ, եթե այդ մեխանիզմը (ուրիշի խոսքը հրապարակելը) իշխանությունները դարձնեն իրավական փաստաթուղթ, ապա այսուհետ ցանկացած հրապարակման համար կարող են դատի տալ ցանկացած լրագրողի, և լրագրողը չի կարող պաշտպանվել: «Իրենց հայցն անհեթեթ է: Իրենք իրավունք չունեին մեր թերթի դեմ հայց ներկայացնելու»,- ասաց Վահագն Հովակիմյանը: Հիշեցնենք, որ օլիգարխները, հերքումից բացի, պահանջում են նաև իրենցից յուրաքանչյուրին վճարել 2-ական մլն դրամ` որպես բարոյական վնասի փոխհատուցում և յուրաքանչյուրին կես միլիոն`դատական ծախսերի փոխհատուցման համար (ընդհանուր առմամբ՝ 7, 5 միլիոն դրամ):