Բաշար Ասադի ռեժիմի դեմ «Սիրիայի բարեկամներ»–ի պատժամիջոցները չեն նպաստում ՄԱԿ-ի և ԱՊԼ–ի հատուկ պատվիրակ Քոֆի Անանի՝ սիրիական հարցի կարգավորման ծրագրի իրականացմանը: Այս մասին հայտարարել է Ռուսաստանի արտգործնախարարի տեղակալ Գենադի Գատիլովը:
Կիրակի օրըՍտամբուլում կայացել է «Սիրիայի բարեկամներ» խմբի անդամ երկրների արտգործնախարարների երկրորդ հանդիպումը: Դրան մասնակցել են շուրջ 60 երկրներ և 10 միջազգային կազմակերպություններ: Ռուսաստանը հանդիպմանը չի մասնակցել:
«Սիրիական իշխանությունները համաձայն են բռնության դադարեցման վերաբերյալ Անանի ծրագրի հետ, բայց պատժամիջոցները դրան չեն տանում»,- Twitter-ում գրել է Գատիլովը։
«Սիրիայի բարեկամներ»–ի համաժողովը կիրակի օրը ճանաչել էր Սիրիայի ազգային խորհուրդը` որպես սիրիական ժողովրդի միակ ներկայացուցիչ, և որոշել էր աշխատանքային խումբ ստեղծել՝ Ասադի ռեժիմի դեմ պատժամիջոցների մշակման համար: Բացի այդ, նրանք իրենց աջակցությունն են հայտնել Անանի ծրագրին:
Հիշեցնենք, որ Սիրիայում շուրջ մեկ տարի չեն դադարում հակակառավարական բողոքները:
