Պակիստանի դատարանն այսօր վճռել է երկրից արտաքսել «Ալ-Քաիդա»-ի նախկին առաջնորդ Ուսամա բեն Լադենի ընտանիքին: Այս մասին հաղորդում է Agence France-Presse-ը:
Բեն Լադենի երեք կանայք և երկու դուստրերը մեղավոր են ճանաչվել Պակիստան անօրինական մուտք գործելու և այդ երկրի տարածքում բնակվելու համար: Դատարանի որոշմամբ՝ Բեն Լադենի ընտանիքի անդամները 45 օր կանցկացնեն Իսլամաբադի իրենց տանը՝ կալանքի տակ, ընդ որում՝ այդ ժամկետը հաշվվում է մարտի 3-ից, երբ նրանք պաշտոնապես ձերբակալվել են: Այնուհետև ամենակարճ ժամկետում նրանց կվտարեն երկրից: Ձերբակալվածների փաստաբանի խոսքերով՝ դա տեղի կունենա ոչ ուշ, քան երկու շաբաթից:
Բեն Լադենի ամենաերիտասարդ և ամենսիրելի կնոջ՝ 30-ամյա Ամալի եղբայրը լրագրողներին հայտնել է, որ ընտանիքի յուրաքանչյուր անդամից կգանձվի 10 հազար ռուփի (110 դոլար) տուգանք: Հստակ տեղեկություն այն մասին, թե որտեղ կարտաքսեն նախկին ահաբեկչի ընտանիքին՝ չկա: Ամալը ծնվել է Եմենում, իսկ մյուս երկու կանայք ծնունդով Սաուդյան Արաբիայից են:
Բեն Լադենի ընտանիքը կալանքի տակ է գտնվում 2011 թ. մայիսից, երբ ամերիկյան հատուկջոկատայինները Աբոտաբատ քաղաքում չեզոքացրին նրան: Նույն թվականի ամռանը «Ալ-քաիդա»ի նախկին առաջնորդի ընտանիքին արգելեցին դուրս գալ Պակիստանից, քանի դեռ չեն պարզվել նրա մահվան հանգամանքները: 2012 թ. փետրվարին Պակիստանի իշխանությունները քանդեցին Բեն Լադենի Աբոտաբադի տունը:
