Շաբաթ օրը Մաշտոցի պուրակում ապամոնտաժման անհաջող փորձերից հետո բնապահպաններին հույս է ներշնչում վաղը ծրագրված բազմամարդ ապամոնտաժման փորձը: «Առաջին լրատվական»-ին այս մասին մանրամասներ փոխանցեց «Թռչկան» քաղաքացիական նախաձեռնության անդամ, լուսանկարիչ, բնապահպանական ակտիվիստ Եղիա Ներսիսյանը:
Նա տեղեկացրեց, որ այսօր՝ ժամը 14.00-ից, Մաշտոցի պուրակ կգա ապամոնտաժող երրորդ բրիգադը: Նա չբացառեց, որ հնարավորության դեպքում լինեն ապամոնտաժման փորձեր, բայց քիչ հավանական համարեց: «Մենք սկսել ենք շուրջօրյա նստացույց, իսկ այսօր պուրակ ժամանող երրորդ բրիգադին վաղը կմիանան առաջին և երկրորդ բրիգադները, այսինքն` վաղը ապամոնտաժողները կլինեն 30-ը, և կարծում ենք, հնարավոր է՝ դրական արդյունք ունենանք»,- հույս հայտնեց Եղիա Ներսիսյանը:
Տեղեկացնենք, որ շաբաթ օրը Մաշտոցի պուրակում տեղադրված կրպակների ապամոնտաժման առաջին փորձերը ձախողեցին այն հասարակական գործիչների խմբի անդամները, ովքեր որոշել էին պուրակում քաղաքացիական արդար դատարանի վճիռն ի կատար ածել և ապամոնտաժել կրպակները: Արդեն երկու օր է՝ Մաշտոցի պուրակում վերսկսվել է նստացույցը, և այստեղ գիշերում են տասնյակից ավելի երիտասարդ բնապահպանական ակտիվիստներ:
Հիշեցնենք, որ նրանք քաղաքային իշխանություններից պահանջում են հանրությանը վերադարձնել պուրակի հանրային տարածքը և այնտեղից ապամոնտաժել մի քանի ամիս առաջ տեղադրված առևտրի կրպակները:
