Հայաստանի բնակչությունն աճում է

Բնակչության թվաքանակի ընթացիկ հաշվառումն իրականացվում է վերջին մարդահամարի (2001 թ. հոկտեմբերի 10-19-ը) արդյունքով ստացված ՀՀ մշտական բնակչության թվաքանակի տվյալների հիման վրա, որոնք արդիականացվում են եռամսյակային պարբերականությամբ, հաշվետու ժամանակաշրջանում արձանագրված բնակչության բնական հավելաճի (գրանցված ծնունդների և մահերի տարբերության) և միգրացիայի մնացորդի (հաշվառման կանգնածների և հաշվառումից դուրս գրվածների տարբերության) տվյալներով: Վերջինիս արդյունքներով, 2010 թ. հունվարի 1-ի դրությամբ, ՀՀ մշտական բնակչության թվաքանակի ցուցանիշը կազմել է 3,249.5 հազ. մարդ և 2009 թ. տարեսկզբի համեմատ աճել է 11.5 հազ. մարդով: Ընդ որում, մշտական բնակչության թվաքանակի ցուցանիշի աճը 2004-2006 թթ. կազմել է` տարեկան միջին հաշվով 0.1%, 2007-2008 թթ.` 0.2%, իսկ 2009 թ.` 0.4 %: ՀՀ մշտական բնակչության քաղաքային և գյուղական բաշխվածությունը պահպանվել է զգալիորեն կայուն: Այսպես, 2010 թ., ինչպես և 2009թ. տարեսկզբին, քաղաքային բնակչության մասնաբաժինը կազմել է 64 %, իսկ գյուղական բնակչությանը` 36%: 2005-2008 թթ. արձանագրված միջին ցուցանիշները եղել են համապատասխանաբար` 64.1% և 35.9%՝ ընդգծելով բնակչության քաղաքային և գյուղական բաշխվածության կայունության բարձր աստիճան: 2010 թ. տարեսկզբին ՀՀ մշտական բնակչության 48.5 %-ը կազմել է արական և 51.5%-ը` իգական սեռի բնակչությունը: