Չինաստանում 6 մարդ է ձերբակալվել այն պատճառով, որ նրանք, իբր, սուտ տեղեկություններ են տարածել, որոնք «վատ ազդեցություն են ունենում հասարակական կարծիքի վրա»: Չինաստանի կառավարության ներկայացուցչի հաղորդմամբ՝ մի քանի հոգու հետ էլ բացատրական աշխատանք է տարվել:
Հայտնի է, որ այս գիշեր Չինաստանի իշխանությունները փակել են այդ երկրում գործող երկու խոշորագույն միկրոբլոգերի կայքերը: Օգտատերերը հնարավորություն չունեն իրենց մեկնաբանությունները տեղադրել այնտեղ: Նշվում է, որ այդ արգելքը կտևի մինչև ապրիլի 3-ը:
Տեղեկացնենք, որ Չինաստանի իշխանությունները նման քայլի են դիմել այն բանից հետո, երբ համացանցում տարածվել են Պեկինում սկիզբ առնող ապստամբության մասին տեղեկություններ:
Բլոգերն այս ամենը կապել է Չինաստանի իշխող վերնախավում սկսված պայքարի հետ. կային պնդումներ, որ երկրին պետական հեղաշրջում է սպառնում: Որոշ լրատվամիջոցների հաղորդմամբ՝ այս լուրերը սկսել են տարածվել կաշառակերության մեղադրանքով Չինաստանի կոմունիստական կուսակցության քաղբյուրոյի անդամի ձերբակալվելուց հետո:
