«Հրապարակ»-ը գրում է, որ երեկ Մաշտոցի պուրակում հոգեբանորեն նախապատրաստվում էին այսօր` ժամը 13:00-ին, մի խումբ կամավորների կողմից կրպակներն ապամոնտաժելու միջոցառմանը:
«Պարբերաբար քաղաքացիներ էին այցելում այգի և պատրաստակամություն հայտնում ներկա գտնվել նախաձեռնությանը: Նախատեսված է, որ քաղաքացիները չպետք է միջամտեն ապամոնտաժմանը, պարզապես իրենց ներկայությամբ պետք է սատար կանգնեն միջոցառումն իրականացնողներին: Ենթադրվում է, որ այսօր այգին բազմամարդ է լինելու, և վերջապես ապամոնտաժվելու են «բուտիկները»»,- ապա թերթը հավելում է.
«Տեղեկացնենք նաև, որ թեև քաղաքապետարանը և ոստիկանությունը հայտարարում են, թե սեփականատերերի իրավունքը պաշտպանելու են, սակայն, մեր տեղեկություններով, այժմ բանակցություններ են գնում կրպակների սեփականատերերի հետ. նրանց այլընտրանքային տարածքներ են առաջարկում մայրաքաղաքի կենտրոնում: Եվ հնարավոր է, որ իսկապես այգին ազատագրվի այդ կառույցներից»:
