Գերմանիայի Սահմանադրության պաշտպանության դաշնային ծառայությունը մեղադրել է kreuz.net գերմանալեզու կաթոլիկ կայքին ծայրահեղականության մեջ, գրում է Koelner Stadt-Anzeiger-ը:
Կայքն իրեն ներկայացնում է որպես Եվրոպայի կաթոլիկ նորությունների խոշորագույն պորտալ, որի համար աշխատում են Գերմանիայի և արտերկրի կաթոլիկ եկեղեցու պաշտոնյաները, սակայն իրականում այն անանուն բլոգ է: Կաթոլիկ եկեղեցին հայտարարել է, որ ոչ մի կապ չունի կայքի ստեղծման հետ:
Գերմանիայի անվտանգության մարմինները պորտալի հրապարակման մեջ հայտնաբերել են միասեռականներին, մահմեդականներին և հրեաներին նվաստացնող հայտարարություններ: Այդուհանդերձ, ինչպես գրում է Sueddeutsche Zeitung-ը, գաղտնի ծառայությունները կայքը ստեղծողներին չեն կարող որևէ մեղադրանք ներկայացնել, քանի որ այն գրանցված է Բահամյան կղզիներում, իսկ սերվերը գտնվում է Կանադայում:
Բացի այդ, կառավարությանը դժվար է պարզել, թե ով է կայքում ծայրահեղական հոդվածներ գրում: Այնուամենայնիվ, հայտնի է դարձել, որ հեղինակներից մեկը Pro Koeln քաղաքացիական շարժման նախագահության անդամ է: Կարծիք կա, որ կայքի ստեղծմանը ներգրավված են նաև պահպանողական կաթոլիկ շարժման կողմնակիցները:
