Եգիպտոսում ԱՄՆ կողմից ֆինանսական օգնություն ստանալու ցանկություն ունեցողների թիվը ռեկորդային չափով նվազել է: Gallup ընկերության անցկացրած սոցիոլոգիական հետազոտության արդյունքները վկայում են, որ եգիպտացիների միայն 15%-ն է ցանկանում ֆինանսական աջակցություն ստանալ ԱՄՆ-ից, 82%-ը կտրականապես դեմ է ամերիկյան փողերին:
Ընդամենը մեկ տարի առաջ՝ 2011թ. ԱՄՆ օգնությանը դեմ էր բնակչության 52%-ը, իսկ կողմ՝ ավելի քան 40%-ը:
Նոր հարցումն անցկացվել է անմիջապես այն բանից հետո, երբ ԱՄՆ կառավարությունը որոշեց Կահիրեին տրամադրել 1.3 մլրդ դոլար, որը հիմնականում պետք է ծախսվի պաշտպանության նախարարության կարիքների վրա:
Եգիպտոսին ամենամյա օգնություն հատկացնելու հետ կապված սկանդալ բարձրացավ այն բանից հետո, երբ Եգիպտոսի իշխանությունները ձերբակալեցին երկրի տարածքում գործող ամերիկյան ոչ կառավարական կազմակերպության մի քանի անդամների՝ նրանց մեղադրելով երկրի ներքին քաղաքական կյանքին միջամտելու մեջ: Նրանց ազատ արձակեցին միայն ԱՄՆ կողմից ֆինանսական օգնությունից զրկելու սպառնալիքներից հետո:
Ինչպես հաղորդում է The Los Angeles Times-ը, վկայակոչելով Եգիպտոսի հարցով մասնագետներին, հենց այդ սկանդալն էլ պատճառ դարձավ, որ եգիպտացիները փոխեն իրենց վերաբերմունքն ամերիկյան ֆինանսական օգնության նկատմամբ: Եգիպտացիների մեծ մասը սա դիտում է որպես Եգիպտոսի ինքնիշխանությունը վաճառքի հանելու օրինակ:
