«Այսօր Հողի միջազգային օրն է: Հայաստանը համարվում է անապատավտանգ տարածք: Տարբեր ուսումնասիրությունների արդյունքում պարզ է դարձել, որ ՀՀ տարածքի մոտ 80 տոկոսին սպառնում է անապատացում, իսկ 25 տոկոսը խիստ անապատավտանգ է»,- այսօր լրագրողների հետ հանդիպման ժամանակ ասաց հողագետ Աշոտ Խոյեթյանը:
Ըստ նրա՝ մենք ունենք հողի սահմանափակ ռեսուրսներ, այդ իսկ պատճառով այս խնդրին պետք է մեծ ուշադրություն դարձնել: «Հայաստանի անպատացման գործում մեծ է մարդու և կլիմայական պայմանների դերը, և մարդու ճիշտ գործունեության արդյունքում այդ գործընթացը կարող է կասեցվել»:
Բանախոսը հավելեց, որ բնության առանձնահատկությունը կայանում է նրանում, որ բոլոր բաղադրիչները միմյանց փոխկապակցված են՝ հողի դեգրադացումը հանգեցնում է մյուս բաղադրիչների դեգրադացման:
Համատեղ ասուլիսի ժամանակ գյուղատնտեսության դոկտոր, պրոֆեսոր Անդրեաս Մելիքյանը նշեց. «Մեր երկիրը լեռնային է, այդ իսկ պատճառով շատ կարևոր է տարածքների ճիշտ և նպատակային օգտագործումը: Արևմտյան Եվրոպայի երկրները և ԱՄՆ-ը վաղուց անցել են տարածքների նպատակային օգտագործման: Ցավոք, մեր տարածաշրջանում այդ ուղղությամբ դեռևս առաջին քայլերն են արվում»:
Նրա խոսքով՝ ՀՀ տարածքում ամենաօգտագործելին հենց հողն է, սակայն հողի ոչ ճիշտ ուսումնասիրությունը և խնդիրները կարող են լուրջ խնդիրների պատճառ դառնալ:
Խոյեթյանը հավելեց, որ հողերի համար լուրջ խնդիր է նաև աղակալումը, իսկ խնդրի լուծումը պահանջում է ֆինանսական լուրջ ներդրումներ:
