Քիչ առաջ Երևանի «Կոնգրես» հյուրանոցում մեկնարկեց «Հայաստան-Իտալիա. Զբոսաշրջության զարգացման հնարավորությունները» խորագրով համաժողովը: Այն անցկացվում է Հայաստանի և Վենետո մարզի միջև զբոսաշրջության խթանմանը նվիրված «Սուրբ Ղազարից դեպի Արարատ» ծրագրի շրջանակներում: Ինչպես լրագրողների հետ ճեպազրույցի ընթացքում տեղեկացրեց ՀՀ էկոնոմիկայի փոխնախարար Արա Պետրոսյանը, համաժողովի նպատակն է ամրապնդել Հայաստանի և Իտալիայի միջև տուրիստական, մշակութային կապերը, ամրապնդել նոր տուրիստական հոսքերը, երկու երկրների համապատասխան մարմիններին միմյանց ավելի ճանաչելի դարձնել:
Ըստ նրա՝ քննարկմանը հրավիրված են ոլորտի և՛ մասնավոր հատվածը, և՛ հասարակական կազմակերպությունները, ներկա են Իտալիայի դեսպանը Հայաստանում, Վենետիկի առևտրաարդյունաբերական պալատի ներկայացուցչական կազմը և տուրիստական խթանման գործակալության ներկայացուցիչները:
Փոխնախարարը համաժողովը գնահատեց եզակի և շատ բացառիկ։ Հաշվի առնելով Հայաստանի նկատմամբ իտալական զբոսաշրջության շուկայի հետաքրքրությունը՝ ասաց, որ պատրաստ են մեկ անգամ ևս քննարկել զարգացման հեռանկարները, վեր հանել խնդիրները։
«Վեր հանել այն խոչընդոտները, որոնք նկատում են մեր իտալացի գործընկերները, վերջիններիս հետ քննարկել տուրիստական հոսքերն ավելացնելու խնդիրները և, ինչու չէ, հաշվի առնելով Իտալիայի մշակութային հսկայական ներուժը և փորձը՝ քննարկել հնարավոր ծրագրերը»,- մանրամասնեց փոխնախարարը:
Համաժողովին հանդես եկան Հայաստանի ազգային մրցունակության հիմնադրամի գործադիր տնօրեն Արման Խաչատուրյանը, ՀՀ էկոնոմիկայի փոխնախարար Արա Պետրոսյանը, Հայաստանում Իտալիայի արտակարգ և լիազոր դեսպան Ն.Գ. Բրունո Սկապինին, Վենետիկի առևտրային պալատի ներկայացուցիչ Ֆրանչեսկո Բաիոչին և Վենետիկի Մխիթարյան միաբանությունից՝ Տիգրան Կարապետյանը: Բացմանը կհաջորդեն կլոր սեղաններ, ելույթներ, ուսումնասիրություններ: Համաժողովը կավարտվի 14.30-ին:
