Թուրքական Dünya Bülteni կայքի փոխանցմամբ՝ Հարավային Կորեայից ու Իրանից վերադարձած Թուրքիայի վարչապետ Ռեջեփ Էրդողանը երեկ Անկարայի «Էսենբողա» օդանավակայանում պատասխանել է իր այդ այցերի վերաբերյալ լրագրողների հարցերին.
«Իրանում հիմնականում քննարկել ենք Սիրիայի և Իրանի միջուկային ծրագրի հարցերը: Ողջ աշխարհը ցանկանում է տեսնել առանց միջուկային զենքի աշխարհ: Որևէ վնաս չկա, որ միջուկային էներգիան օգտագործվի խաղաղ նպատակներով: Իրանի միջուկային ծրագրի հարցը պետք է կարգավորվի դիվանագիտական ճանապարհով:
Ինձ հետ հանդիպման ժամանակ Խամենեին (Իրանի գերագույն ղեկավար ու հոգևոր առաջնորդ) հայտարարեց, որ զանգվածային ոչնչացման զենք (ԶՈԶ) պատրաստելը չի համապատասխանում իրենց կրոնական նկատառումներին: Ողջ աշխարհի ուշադրությունը բևեռվել է Իրանի վրա: Իսրայելը դուրս է մնացել այդ ուշադրությունից: Ոչ ոք նրանից հաշվետվություն չի պահանջում:
Ինչ վերաբերում է Սիրիային, ապա անգամ Քոֆի Անանի պլանի ընդունումից հետո այդ երկրում չի դադարում զոհերի գրանցվելը: Պետք է դադարեցնել արյունահեղությունը և մարդասիրական օգնություն ուղարկել Սիրիային: Վաղը (այսինքն՝ այսօր.- 1in.am) ես Սիրիայի հարցով հեռախոսազրույց կունենամ Անանի հետ:
Իսկ կիրակի օրը Ստամբուլում տեղի կունենա «Սիրիայի բարեկամների խմբի» երկրորդ հանդիպումը, որին մասնակցելու են նաև Անանն ու ՄԱԿ-ի գլխավոր քարտուղարը: Ներկայիս դրությամբ այդ հանդիպմանը մասնակցելու է 71 երկրի ներկայացուցիչ: Այդ թիվը կարող է աճել»:
