Արդեն քանի օր է` «Ժողովուրդ»-ի խմբագրություն են զանգահարում Սյունիքի մարզում գտնվող «Լեռեքս» ՍՊԸ պղնձամոլիբդենային հանքի աշխատակիցներ և բողոքում, որ ընկերությունն իրենց աշխատավարձերը չի վճարում:
«Մեր հավաստի տեղեկություններով` հանքը պատկանում է Սյունիքի մարզպետ Սուրեն Խաչատրյանին:
Մեր զրուցակիցները նշում են, որ «Լեռեքս»-ի տնօրինությունն անգամ հայտնել է իրենց, որ հանքը շուտով փակվելու է: Տևական ժամանակ աշխատավարձ չստացած աշխատակիցները ցանկանում են իմանալ, թե երբ են իրենց վճարելու, և ի վերջո, ինչ է լինելու իրենց հետ»:
Ըստ թերթի տեղեկությունների` Սուրեն Խաչատրյանը (Լիսկան) տարբեր տեղերից վարկեր է վերցրել հանքը շահագործելու համար, սակայն այժմ չի կարողանում «տակից» դուրս գալ, այդ իսկ պատճառով էլ որոշել է հանքի աշխատանքը կասեցնել:
Արդեն երկու օր շարունակ «Ժողովուրդ»-ը փորձում է այդ ամենի հետ կապված մեկնաբանություն ստանալ Սյունիքի մարզպետից:
«Առաջին օրը մարզպետն ասաց, որ խորհրդակցության է և չի կարող մեր հարցերին պատասխանել` խնդրելով ավելի ուշ զանգել: Իսկ երեկ ընդհանրապես չպատասխանեց մեր հեռախոսազանգերին:
Իսկ «Լեռեքս» ՍՊԸ-ի գործադիր տնօրեն Արմեն Բակունցը թերթին ասել է. «Ուղղակի զարմանալի ա, որ ձեզ են դիմել, դա ի՞նչ խնդիր ա ասենք»:
