Մեծ Մանչեսթերի ոստիկանական էլիտար ստորաբաժանման երեք անդամներ պաշտոնանկ են արվել այն բանից հետո, երբ բրիտանական ԶԼՄ-ներում հրապարակվել են նրանց լուսանկարները, որոնցում նրանք խաղում են հրազենով: Այս մասին գրում է The Daily Telegraph պարբերականը:
Ենթադրաբար լուսանկարներն արվել են նրանց հրահանգչի կողմից: Լուսանկարում զինվորներից մեկը կանգնած է զրահապատ Land Rover Defender-ի վրա, իսկ մյուսը զենքից նշան է բռնել նրա վրա: Ամենայն հավանականությամբ զենքը լիցքավորված չէ: Երկուսն էլ ոստիկանական համազգեստով են և ունեն մարտական փամփուշտներով Glock ատրճանակներ:
ԶԼՄ-ների հաղորդմամբ՝ լուսանկարը հայտնաբերվել է համակարգչում՝ «տվյալ գործի հետ կապ չունեցող» ստուգման ժամանակ: Ենթադրվում է, որ լուսանկարն արվել է 2008թ. ծառայակիցներից մեկի կողմից անզգուշությամբ սպանված ոստիկան Այան Թերիի մահվան գործի քննության ընթացքում:
Թերիի կինը շատ ցավոտ է արձագանքել մամուլում հրապարակված լուսանկարներին՝ դրանք համարելով «ոչ տեղին» իր ամուսնու ողբերգական մահից հետո: «Այս լուսանկարները վշտացնում են ընտանիքին և ընդգծում, որ Մանչեսթերի ոստիկանությունը և մասնավորապես այդ ռազմականացված ջոկատը ոչ մի բան չի սովորել Այան Թերիի ողբերգական մահվան հանգամանքներից»,- ասել է փաստաբան Ջեյմս Ռեյլին:
«Մեծ Մանչեսթերի ոստիկանությունն ակնկալում է իր բոլոր պաշտոնատար անձանից և աշխատակիցներից բարձր մասնագիտական չափանիշներ»,- ասել է ոստիկանության պետ Իեն Հոլքինսը: Նրա խոսքերով՝ տվյալ դեպքն ուսումնասիրվել է անմիջապես, երբ դրա մասին հայտնի է դարձել 2011թ. հունիսին: «Ֆոտոշարքին» մասնակցած 3 սպաները հանձնել են զենքերը և հեռացվել ծառայությունից մինչև հետաքննության ավարտը:
