Թուրքական Hürriyet թերթի փոխանցմամբ՝ վարչապետ Ռեջեփ Էրդողանի՝ Իրանում գտնվելու ժամանակ (այս րոպեներին տեղի է ունենում Էրդողա-Ահմադինեժադ հանդիպումը) Թուրքիայում ԱՄՆ դեսպան Ֆրենսիս Ռիկիարդոնեն թուրքական կողմի համար անակնկալ հայտարարություն է արել.
«Մի շարք երկրներ զգալիորեն նվազեցրել են իրանական նավթի ներկրումը: Մենք ակնկալում ենք, որ Թուրքիան նույնպես կվարվի այդ երկրների նման: Մենք սպասում ենք, որ Թուրքիան որոշում կկայացնի տվյալ հարցում: Դա անհրաժեշտ է Իրանի միջուկային ծրագրի զարգացման խոչընդոտման համար»:
Ամերիկացի դեսպանն անդրադարձել է նաև Սիրիայի խնդրին. «ԱՄՆ-ը և Թուրքիան Սիրիայում արտաքին ռազմական միջամտությունը դիտարկում են որպես վերջին տարբերակ: Նրանց համար դա ամենաանցանկալի տարբերակն է: Այդ հարցը պետք է լուծվի դիվանագիտական ճանապարհով՝ միջազգային իրավունքին համապատասխան: Մենք համատեղ աշխատում ենք սիրիական խնդրի կարգավորման ուղղությամբ»:
Հիշեցնենք, որ ավելի վաղ թուրքական կողմը հայտարարել է, որ իր վրա չեն կարող տարածվել Իրանի նկատմամբ սահմանված ամերիկյան ու եվրոպական պատժամիջոցները՝ ընդգծելով, որ իր համար չափանիշ կարող են հանդիսանալ միայն ՄԱԿ ԱԽ-ի ընդունած բանաձևերը: Դա նշանակում էր, որ Թուրքիան շարունակելու է նույն տեմպերով ներկրել իրանական նավթ:
