Չինական ավտոբուսների որակական գնահատականը կարելի կլինի տալ որոշ ժամանակ դրանց շահագործումից հետո միայն: Նման կարծիք «Առաջին լրատվական»-ի հետ զրույցում հայտնեց ՀՊՃՀ Վերգետնյա տրանսպորտային միջոցների ամբիոնի վարիչի պաշտոնակատար Սուրեն Չիբուխչյանը:
«Նոր են ներկրել, ժամանակ է պետք, որ շահագործեն, բեռնվածքի տակ աշխատեն, հետո որակի մասին խոսենք: Զուտ տեխնիկական տվյալները անձնագրում նայել կարելի է, բայց որակի գնահատականը շահագործումից հետո պետք է տրվի»,- ասաց Ս. Չիբուխչյանը:
Ամեն դեպքում, ըստ նրա, չինական «Հայեր բաս» ֆիրման Չինաստանում հայտնի է, բայց միջազգային համբավ չի վայելում: Այն դիտարկմանը, որ հասարակությունում կարծիք կա, որ չինականը անորակ է, Ս. Չիբուխչյանը չհամաձայնեց. «Այդպես միանշանակ ասել չի կարելի: Չինական արտադրանք կա, որ բավականին բարձր որակ ունի: Եթե չինական էժան ապրանք եք վերցնում, գիտեք, որ էժանությունը պայմանավորված է որակով, բայց ֆիրմային արտադրանքի հատկանիշները բավական նորմալ են, և բոլորին պիտակ կպցնել չի կարելի»:
Մասնագետի խոսքով` ավտոբուսների արտանետվածքում թունավոր նյութերի պարունակությունը կարելի է գնահատել միայն հատուկ լաբորատոր ստուգման արդյունքում:
