Կանադայի ռազմածովային ուժերի սպա Ջեֆֆրի Պոլ Դելայլը, ում դատավարությունը, կապված լրտեսական սկանդալի հետ, սկսվել է չորեքշաբթի օրը, Ռուսաստանին փոխանցել է այնքան մեծ ծավալի գաղտնի տվյալներ, որոնք կարող են համեմատվել WikiLeaks-ի միջոցով տարածված արտահոսքի ծավալների հետ։ Այս մասին հաղորդել է ամերիկյան The Wall Street Journal թերթը՝ հղում անելով հատուկ ծառայությունների տեղեկատվական աղբյուրներին:
Հրատարակության տվյալներով՝ գաղտնի տեղեկության արտահոսքն ԱՄՆ-ին զայրացրել է այն առումով, որ կանադացիները վատ են պահում ոչ միայն իրենց, այլ նաև դաշնակիցներին վերաբերող գաղտնիքները։ Այդ իսկ պատճառով Դելայլի արարքը «լուրջ անհամաձայնություն է առաջացրել ամերիկյան և կանադական հետախուզության պաշտոնատար անձանց միջև»:
Կանադական իշխանությունները պաշտոնապես չեն հայտարարել, թե կոնկրետ ինչ տեղեկության արտահոսքի մասին է խոսքը: Պաշտոնապես չի հայտարարվում նաև այն մասին, որ այն իրապես փոխանցվել է Ռուսաստանին:
Լրագրողների հարցումներին Կանադայի պաշտպանության նախարարությունը հրաժարվում է մեկնաբանություններ տալ այդ պատմության առնչությամբ: Հունվարին Կանադայի պաշտպանության նախարար Պիտեր Մաքքեյը լրագրողներին միայն ասել է, որ լրտեսական սկանդալը չի անդրադառնա Կանադայի հեղինակության վրա՝ իր դաշնակիցների շրջանում:
Կանադական ռազմաօդային ուժերի կապի և հետախուզության կենտրոնում ծառայող կրտսեր լեյտենանտ Ջեֆֆրի Պոլ Դելայլը ձերբակալվել էր հունվարի կեսին՝ կանադական հակահետախուզության կողմից: Նրան ձերբակալել են չափազանց գաղտնի տեղեկությունների փոխանցման պահին:
Կանադայում ՌԴ դեսպան Գեորգի Մամեդովը փետրվարին լրագրողների հետ զրույցում հայտնել է, որ Ռուսաստանի և Կանադայի միջև մեկնաբանություններ չանելու պայմանավորվածություն կա: «Ես պայմանավորվածություն ունեմ՝ այս հարցի հետ կապված լռություն պահպանել»,- այսպես է նա պատասխանել լրտեսական սկանդալին Մոսկվայի մասնակցության վերաբերյալ լրագրողի հարցին՝ ավելացնելով, որ մի օր գուցե «լռության կնիքը հանվի»:
