Ռուսաստանի արտաքին քաղաքականության նպատակը Լատվիայի վարկաբեկումն է ու փլուզվող երկրի տպավորություն ստեղծելը, որտեղ ծաղկում է ֆաշիզմը: Սա պարզել են լատվիական հատուկ ծառայությունները: Ընդ որում, Լատվիայի Սահմանադրության պաշտպանության բյուրոյի կարծիքով, Ռուսաստանի «գաղտնի» նպատակին հասնելու համար որպես զգալի ռեսուրս են դիտվում «այսպես կոչված՝ ռուս հայրենակիցները»:
Ռուս պաշտոնյաները հրապարակավ հայտարարում են իրենց մտադրության մասին` կոնսոլիդացնել ռուսախոս համայնքը (Լատվիայի բնակիչների 44 տոկոսը), հայտարարում են նրանց հետ համագործակցելու, տեղեկատվական ուժեղ ազդեցություն ապահովելու ու երիտասարդության աշխատանքներին ներգրավվելու մասին:
«Ռուսաստանի արտաքին քաղաքականությունը ուղղված է Լատվիայի դեմ կեղտոտ արշավների կազմակերպմանը` նրան մեղադրելով «ֆաշիզմը վերածնելու, պատմությունը վերաձևելու մեջ, կամ Լատվիան որպես ոչ կայացած պետություն ներկայացնելուն»,- նշված է հատուկ ծառայության կայքում:
Ռուսական քաղաքականության նպատակներից մեկը ռուսերենի կարգավիճակի ամրապնդումն է Լատվիայում, ինչպես նաև Եվրամիությունում ռուսերենին պաշտոնական կարգավիճակը տալը:
Լատվիայի հատուկ ծառայության տվյալներով` Ռուսաստանի արտաքին քաղաքականության ևս մեկ գործիք է տեղեկատվական քաղաքականությունը ու նպատակաուղղված քարոզչությունը` ԶԼՄ-ների և հատուկ այդ նպատակով ստեղծված կազմակերպությունների միջոցով: Բյուրոյի հաշվետվության մեջ պարունակվող այլ կարևոր տեղեկությունները գաղտնի են:
