Այսօր Orange-ի կենտրոնական գրասենյակում հրավիրված հանդիպման ժամանակ ընկերության գլխավոր տնօրեն Բրունո Դյութուան և մարքեթինգի տնօրեն Արամ Մկրտչյանը ամփոփեցին 2010 թ. ընկերության ունեցած ձեռքբերումները և ներկայացրին Oranգe-ի նոր նախագիծը:
Անակնկալներից մեկն այն է, որ այսուհետ Օrange-ի «Խոսենք» կանխավճարային ծառայության բաժանորդները, ամեն անգամ հաշիվը լիցքավորելով 500 և ավելի դրամով, այլ ցանցեր կզանգեն համեմատաբար ցածր՝ 30 դրամ/րոպե սակագնով, իսկ ցանցի ներսում կխոսեն 1 դրամով 31 օրվա ընթացքում: «Մեր բաժանորդները, հաշիվը լիցքավորելով 500 և ավելի դրամով, ձեռք կբերեն հնարավորություն՝ ստանալու 100 հեռախոսներից մեկը»,- տեղեկացրեց Արամ Մկրտչյանը: Նվեր հեռախոս կստանա շաբաթվա ընթացքում հաշիվը լիցքավորած բաժանորդներից յուրաքանչյուր 1000-րդը:
«Առաջին լրատվական»-ի հետ ցազրույցում Orange-ի գլխավոր տնօրեն Բրունո Դյութուան խոսեց նաև հայաստանյան ինտերնետ-բաժանորդներին առաջարկվող սակագներից. «Հայաստանում Orange-ը ապահովում է ինտերնետ գրեթե կրկնակի էժան սակագներով, քան եվրոպական երկրներում, օրինակ՝ Ֆրանսիայում և Մեծ Բրիտանիայում»: Ըստ Դյութուայի` Հայաստանում Orange-ի ինտերնետը ոչ միայն էժան է, այլև որակյալ` ապահովելով մոտ 7 մեգաբիթ-վայրկյան միջին արագություն: «Մենք ամենամեծ 3G ծածկույթն ենք ապահովում Հայաստանի տարածքում: Դրա շնորհիվ հարյուրավոր բաժանորդներ ունենք Հայաստանի հեռավոր գյուղերից, որոնցից շատերում Orange-ը միակ հասանելի ինտերնետ կապն է»,- ավելացրեց Դյութուան: