Կապանի տարածաշրջանի դպրոցների և մանկապարտեզների գործունեությունը չի դադարեցվել: «Ջրծաղկի վտանգ չկա, հաստատություններն աշխատում են բնականոն»,- հայտարարել է մարզի գլխավոր սանիտարական բժիշկ Լենա Մալինցյանը: Վերջին օրերի հետազոտությունները ցույց են տալիս, որ հիվանդությունը նահանջում է: Հիվանդ երեխաների թիվը մեծ էր դեկտեմբեր ամսին: Հիվանդության դեպքեր առավել շատ են արձանագրվել Կապանի Հալիձոր թաղամասի թիվ 12 մանկապարտեզում: Այստեղ երեխաների ցածր հաճախելիության պատճառով որոշ ժամանակով փակվել են խմբեր: Բայց, ըստ Կապանի քաղաքապետարանի կրթության բաժնի պետ Անուշ Սիմոնյանի, տարվա այս սեզոնին միշտ նկատվում է երեխաների հաճախելիության նվազում, չնայած բոլոր մանկապարտեզները ջեռուցվում են: Ջրծաղիկ հիվանդության դեպքեր չկան մարզի մյուս տարածաշրջաններում` Գորիսում, Սիսիանում և Մեղրիում: Այս տարածաշրջաններում հիվանդության վարակ արձանագրվել է նախորդ տարիներին, մինչդեռ մարզկենտրոնում չի եղել: Ամեն դեպքում, հիվանդության կանխարգելիչ միջոցառումները մարզի բոլոր կրթական հաստատություններում շարունակվում են:
