«Ժառանգություն» և «Ազատ դեմոկրատներ» կուսակցությունների ընդունած «Ուխտ Նոր Հայաստանի» հռչակագիրն իր մեջ արտառոց ոչ մի դրույթ չի պարունակում. այն կարելի է բնորոշել որպես նախընտրական ծրագրի մի մաս: «Առաջին լրատվական»-ի հետ զրույցում նման տեսակետ հայտնեց քաղաքական և ընտրական տեխնոլոգիաների փորձագետ Արմեն Բադալյանը:
«Սա ցանկությունների արտահայտման սովորական ձև է: Նմանօրինակ հռչակագրեր շուտով կընդունեն նաև քաղաքական մյուս ուժերը, որովհետև նախընտրական շրջանում այդպես ընդունված է ամբողջ աշխարհում»,- նկատեց նա:
Արմեն Բադալյանը նաև նշեց, որ չի կարծում՝ «Ժառանգությունն» ու «Ազատ դեմոկրատներն» այնքան ներուժ ունեն, որ կարողանան կյանքի կոչել հռչակագրում առկա դրույթները: «Նախ, նրանց միավորումը ոչինչ չտվեց: «Ազատ դեմոկրատները», որպես առանձին կուսակցություն, ճիշտ է, գրանցված է Արդարադատության նախարարությունում, սակայն փաստացի գոյություն չունի: Այդ կուսակցությունը, նախ, խնդիր ունի հաղթահարելու 5 տոկոսանոց շեմը, հետո նոր նմանօրինակ հայտարարություններ անելու»,- ասաց փորձագետը:
Նշենք, որ նախօրեին «Ժառանգություն» կուսակցության առաջնորդ Րաֆֆի Հովհաննիսյանի առաջնորդությամբ տեղի է ունեցել կուսակցության նախընտրական ցուցակում ընդգրկված քաղաքական և հասարակական գործիչների, քաղաքացիական հանրության ներկայացուցիչների հավաք: Որպես մեկ միասնության ներկայացուցիչներ` մասնակիցները ստորագրել են «Ուխտ Նոր Հայաստանի» վերնագրված հռչակագիրը:
Փաստաթղթում, մասնավորապես, նշվում է. «Մեր դավանած գերագույն արժեքներն են քաղաքացիական իրավունքը, պետական ինքնիշխանությունը և ազգային շահը: Այդ արժեքների ամրապնդման ու տարածման հրամայականով մենք մասնակցելու ենք առաջիկա խորհրդարանական, ապաև` նախագահական ընտրություններին: Մենք պայքարելու ենք հաղթելու համար և ձևավորելու ենք նոր իշխանություն` նոր կառավարությամբ: Մենք ազատ մրցակցային տնտեսության և սոցիալական շուկայի կողմնակիցներ ենք, իսկ քաղաքական ոլորտում նախապատվությունը տալիս ենք խորհրդարանական կառավարման տիպօրինակին:
Մենք ընդունում ենք, որ հայ-թուրքական հարաբերությունները պետք է կարգավորվեն պատմական արդարության, միջազգային իրավունքի, Հայոց ցեղասպանության ու Մեծ հայրենազրկման ճանաչման և հատուցման հիման վրա: Հայաստան-Թուրքիա սահմանը պետք է բացվի, իսկ դիվանագիտական հարաբերությունները պետք է հաստատվեն առանց նախապայմանների: Եթե Թուրքիան շարունակի նախապայմաններ առաջ քաշել, ապա Հայաստանը նույնպես պետք է սեղանին դնի իր նախապայմանները:
Լեռնային Ղարաբաղի Հանրապետության` Արցախի խնդիրը պետք է լուծվի նրա ինքնիշխանության և ամբողջականության ճանաչման եղանակով: ԼՂՀ-ն նաև պետք է ինքնուրույն սերտաճի միջազգային և հատկապես` եվրոպական կառույցներում:
Ընդունելով հանդերձ Ռուսաստանի հետ իրավահավասար ռազմավարական և ԱՄՆ-ի հետ սերտ գործընկերային հարաբերությունների զարգացման ու խորացման անհրաժեշտությունը, Հայաստանի Հանրապետության գլխավոր արտաքին քաղաքական ուղենիշ մենք համարում ենք հարաճուն ինտեգրումը եվրոպական հանրակարգերին` Եվրոպական Միության լիիրավ անդամ դառնալու հեռանկարով»:
