Ինչպես փոխանցում է Interfax գործակալությունը, Ռուս Ուղղափառ եկեղեցու սինոդային բաժնի պատասխանատու հայր Վսեվոլոդ Չապլինն առաջարկել է մշակել համառուսաստանյան «զգեստակարգ», որը կկարգավորեր տղամարդու և կնոջ` հասարակական վայրերում այս կամ այն զգեստով հայտնվելու նորմերը: Այս մասին Չապլինը գրել է բաց նամակում` միաժամանակ շեշտելով, որ սա չի վերաբերում «ստրիպտիզ ակումբերին և հասարակաց տներին»:
Սակայն նա նամակում չի նշում, թե կոնկրետ ինչպես պետք է հագնվի «բարեկիրթ» տղամարդը կամ կինը բազմակոնֆեսիոնալ Ռուսաստանում:
Ավելի վաղ մամուլում հայտնվել էր Չապլինի այն հայտարարությունը, թե կարճ շրջազգեստները սադրում են բռնաբարություններ: «Կարճ շրջազգեստ հագնելը, միևնույն է, սխալ է, անկախ այն բանից՝ կնոջը բռնաբարել են, թե ոչ: Եթե կինը գրասենյակում հագնվում է անբարոյականի պես, մյուս կանայք պետք է իրավունք ունենան դա նրան ասելու»,- նշել է Չապլինը:
Հասարակության մեջ այս հայտարարությունները միանշանակ գնահատականի չեն արժանացել: Շատերը պնդում են, որ արտաքին տեսքը յուրաքանչյուր մարդու անձնական գործն է, իսկ Ռուս Ուղղափառ եկեղեցուց պահանջել են ներողություն խնդրել այս հայտարարությունների համար:
