Թուրքական İhlas լրատվական գործակալության փոխանցմամբ՝ թուրք երգչուհի Սեզեն Աքսուն, չդիմանալով հասարակական ճնշմանը, որոշել է իր Kök (Արմատ) անունով ալբոմում չներառել հայտնի «Սարը գելին» ( «Դեղին հարս» կամ «Նորահարս) երգի հայերեն կատարումը: Այս մասին նա հայտարարել է երեկ:
Ադրբեջանական կողմից բացի, դրա դեմ ընդվզել էին նաև թուրքական ազգայնական տարրերը և մասնավորապես Էրզրումի բնակիչները, որոնց կարծիքով՝ այդ երգը թուրքական է:
Հիշեցնենք, որ Ադրբեջանը և Թուրքիան ժխտում են երգի հայկական ծագումը և շեշտում են դրա ադրբեջանական կամ թուրքական ծագում ունենալը: Սակայն հայկական կողմը պնդում է, որ երգը թուրքերի կողմից գողացվել ու թրքացվել է:
Ի դեպ, 2009 թվականին Թուրքիայի կրթության նախարարության հրահանգով թուրքական դպրոցներում ցուցադրվեց «Սարը գելին – Հայկական հարցի ներքին երեսը» խորագրով հակահայկական և Հայոց ցեղասպանությունը ժխտող ֆիլմը: Սակայն դա առաջացրեց աշակերտների ծնողների բողոքը, քանի որ ֆիլմում կային այնպիսի դրվագներ (դիակների, կտրված գլուխների տեսարաններ), որոնք բացասական ազդեցություն էին թողնում դպրոցականների հոգեկան աշխարհի վրա:
Բացի այդ, ֆիլմում առկա էր «Հայաստանի դպրոցներում նկարահանված» երդման արարողության մի կեղծ տեսարան, որի ընթացքում հայ աշակերտները, իբր թե, երդվում են վրեժխնդիր լինել թուրքերից։
