Ինչպես գրում է թուրքական Zaman օրաթերթը, հայտնի լրագրող Ադեմ Յավուզ Արսլանը իր նոր «Հայը գոյություն ունի. Հրանտ Դինքի սպանության օպերացիան» («Bi’ Ermeni Var: Hrant Dink Operasyonunun Şifreleri») գրքում հրապարակել է մի նկար, որում հստակ երևում է, որ այս սպանության հետ «Էրգենեկոն» խմբավորման կապերն անհերքելի են:
Հիշեցնենք, որ այժմ Թուրքիայում ընթանում է դատավարություն ընդդեմ «Էրգենեկոն» խմբավորման, որի անդամներին մեղադրում են երկրում անկայունության, սպանությունների կազմակերպման միջոցով պետական իշխանությունը տապալելու փորձ կատարելու մեջ: Մեղադրյալի աթոռին բարձրաստիճան զինվորականներ և պետական պաշտոնյաներ են` նախկին և ներկա:
Լրագրողը փորձել է ապացուցել նրանց կապը նաև Հրանտ Դինքի սպանության հետ: Հրապարակված նկարում երևում է, որ իրար հետ բավականին մոտ են եղել պաշտոնաթող գեներալ Վելի Քյուչուկը, որն անցնում է «Էրգենեկոնի» գործով՝ որպես խմբավորման պարագլուխ, և գնդապետ Ալի Յոզը, որը Դինքի սպանության դավադրությունը կազմակերպելիս Տրապիզոնի ժանդարմերիայի ղեկավարն էր:
Հրանտ Դինքի սպանությունից երկու տարի անց (սպանությունը տեղի էր ունեցել 2007 թ. հունվարի 19-ին) դատախազությունը գնդապետ Յոզի համար պահանջեց երկու տարի ազատազրկում, քանի որ վերջինս չէր հետևել և չէր քննել Դինքի դեմ սպանության նախապատրաստության մասին լուրերը: Ինչպես Դինքի մարդասպան Սամաստ Օգյունը, այնպես էլ նրա գործընկեր Յասին Հայալը Տրապիզոնից են:
Լրագրողի գրքում ասվում է նաև, որ ժանդարմերիայում վերացվել է այն փաստաթղթային բազան, որով ապացուցվում էր, որ իրավապահները տեղյակ են եղել սպանության նախապատրաստությանը:
Գրքում ապացույցներ կան նաև 2007 թ. Մալաթիայում երեք քրիստոնյա հոգևորականների սպանության մասին:
