Երեկ՝ մարտի 26-ին, Նուբարաշեն քրեակատարողական հիմնարկ է տեղափոխվել Արարատի մարզի Ջրաշեն գյուղի բնակիչ, 23-ամյա Գևորգ Սարգսյանը:
ֆոտոլրագրող Գագիկ Շամշյանը News.armeniatv.com-ին հայտնել է, որ Գ. Սարգսյանը Նուբարաշենի բանտ է տեղափոխվել Արարատի մարզի ընդհանուր իրավասության դատարանից: Նշված դատարանի դատավոր Գագիկ Սարգսյանի որոշմամբ, նրա նկատմամբ կիրառվեց երկամսյա կալանք:
Ոստիկանության քննչական գլխավոր վարչության Արարատի մարզի քննչական բաժնի քննիչը միջնորդել էր նշված դատարանին, որպեսզի առանձնակի դաժանությամբ սպանություն կատարած Գևորգ Սարգսյանի նկատմամբ ընտրվի երկամսյա կալանք: Դատավորը դռնփակ դատական նիստն անելուց և խորհրդակցական սենյակից վերադառնալուց հետո բավարարեց քննիչի միջնորդությունը:
News.armeniatv.com-ը հիշեցնում է, որ Գ. Սարգսյանը բերման էր ենթարկվել իր հարևանին՝ ազգությամբ եզդի, 74-ամյա թոշակառու Չինար Խուդոյանին առանձնակի դաժանությամբ սպանելու կասկածանքով: Մարդասպանը դանակի բազմաթիվ հարվածներ էր հասցրել իր զոհի պարանոցի, կրծքավանդակի և որովայնի շրջաններում:
Սպանությունը կատարելուց հետո նա հափշտակել էր 74-ամյա զոհի ոսկյա ականջօղերն ու մատանին, ինչպես նաև «Սամսունգ» տեսակի բջջային հեռախոսը: Սպանելուց հետո ալիբի ստեղծելու նպատակով մահացածին մարմնի վրա թողել էր գրություն. «Էս քո տղու համար: Ինքը տարավ մեր փողերը: Ես էլ խլեցի քո կյանքը: Հաջորդը մարդդ ա»: Նման կերպով նա փորձել է շեղել ոստիկանությանը: Ջրաշենցիները Գ. Շամշյանին պատմել են, որ Սարգսյանների ընտանիքը մի քանի տարի առաջ է Կոտայքի մարզի Սոլակ գյուղից տեղափոխվել և բնակություն հաստատել Ջրաշեն գյուղում:
Տեղափոխվելու պատճառն, ըստ ջրաշենցիների, այն է, որ նրանց հորեղբայրը մի քանի տարի առաջ նման եղանակով սպանել է սոլակցի իր հարևանին և որպեսզի գյուղացիները վրեժխնդիր չլինեն, դուրս է եկել Սոլակից: Հարևանը նրան բռնացրել էր գյուղի եկեղեցուց գողություն կատարելու պահին:
Քննիչի որոշմամբ, նշանակվել են մի շարք փորձաքննություններ, այդ թվում՝ հետքաբանական, մատնադրոշմային, ձեռագրաբանականմ դիակի դատաբժշկական և հոգեբուժական:
Լուսանկարները` Գագիկ Շամշյանի:
