Այսօր Pussy Riot պանկ խումբն իր բլոգում պատասխանել է համայն Ռուսիո պատրիարք Կիրիլ 2-րդի հայտարարությանը: Դրանում նրանք հերքում են իրենց հասցեին անարգանքի մեղադրանքները և իրենց արարքը համարում աղոթք:
Կիրիլ 2-րդը մարտի 24-ին հայտարարել էր, որ «սատանան ծաղրել է մեզ բոլորիս», և դատապարտել էր «այն մարդկանց, որոնք արդարացնում են այդ անարգանքը, մեղմացնում այն, փորձում ներկայացնել որպես նոր զվարճալի կատակ:
Իրենց պատասխանում Pussy Riot-ի ակտիվիստները գրել են, որ իրենց ելույթը Քրիստոս Ամենափրկչի տաճարում եղել է ոչ թե անարգանք, այլ աղոթքի յուրօրինակ ձև: «Մեր աղոթքը չէր կարող «ծաղր լինել մեծ սրբավայրի նկատմամբ», քանի որ հենց մեր սրբավայրերի պաշտպանության համար էլ մենք աղոթում էինք Աստվածամորը: Մենք աղոթում էինք, որպեսզի Աստվածամայրը խիզախություն և ուժ տա մեր ժողովրդին՝ վտարել Հերովդես թագավորին և նրա ծառաներին »,- ասվում է հաղորդագրության մեջ:
Տեքստի հեղինակներին «տանջում են կասկածները, որ սրբավայրը, որի պղծման մեջ դուք (Կիրիլ 2-րդը) մեզ մեղադրում եք, ձեր մտքերում անբաժանելիորեն կապված է Պուտինի հետ, որը, ձեր խոսքերով, վերադարձրել է այն եկեղեցուն: Ուստի Աստվածամորն ուղղված աղոթք-խնդրանքը՝ հեռացնել նրան, ով ամեն օր իր գործողություններով պղծում է Ռուսաստանում մարդկային կյանքի ամենալուսավոր գաղափարները և ուղղափառ հավատի բոլոր հնարավոր պատվիրանները, դուք ընդունել եք որպես անարգանք սրբավայրի հանդեպ»:
Հիշեցնենք, որ փետրվարի 21-ին Pussy Riot-ի ակտիվիստները վառ զգեստներով և դեմքը ծածկող դիմակներով ներխուժել էին Քրիստոս Ամենափրկչի եկեղեցի և հենց խորանի մոտ փորձել «համերգ տալ»:
