Ամերիկացի միլիարդատեր, բարերար, Microsoft ընկերության համահիմնադիր Փոլ Ալենը իր հիմնադրած ինստիտուտում ուղեղի մանրամասն ուսումնասիրության աշխատանքների շարունակության համար 300 մլն դոլար է տրամադրել,- հաղորդում է Chicago Tribune: հերթական դրամաշնորհը նախագծի ֆինանսավորումը կհասցնի կես միլիարդ դոլարի։
Հատկացված գումարը հնարավորություն կտա Ալենի ուղեղի հետազոտության ինստիտուտում (Allen Institute for Brain Science) կրկնապատկել աշխատակազմը՝ հասցնելով 350 մարդու, և համալրել գորշ նյութերի ուսումնասիրության մեթոդների զինանոցը:
Աշխատանքների հաջորդ փուլը նվիրված կլինի մկների տեսողական գործընթացի մանրամասն ուսումնասիրությանը:
Մկների տեղեկատվությունն ընկալելու և արտաքին ազդանշաններին արձագանքելու ունակությունը կապված է այնպիսի բարձր մտավոր գործոնների հետ, ինչպիսիք են գիտակցությունը, ընկալումն ու որոշումների կայացումը: Սակայն հիմնական նպատակն ոչ թե տեսողության, այլ ուղեղի աշխատանքը հասկանալն է:
Մարդու ուղեղը հազար անգամ ավելի բարդ է, քան մկներինը, սակայն հիմնական տարրերը նույնն են, և մկների ուղեղի մանրամասն ուսումնասիրություններն անկասկած կօգնեն հասկանալ, թե ինչ է կատարվում մարդու ուղեղում էպիլեպսիայի և կենտրոնական նյարդային համակարգի այլ հիվանդությունների ժամանակ:
Ալենի ինստիտուտը հիմնադրվել է 2003 թ.:
