ԱՄՆ-ի ոստիկանությունը ձերբակալել է Սան Ֆրանցիսկոյի հարավում տեղակայված բնակելի տներից մեկում հայտնաբերված 5 մարդու սպանության կասկածյալին: Այս մասին երկուշաբթի հաղորդել է Associated Press գործակալությունը:
Երեք կնոջ և երկու տղամարդու մարմինները հայտնաբերվել էին ուրբաթ օրը քաղաքի խաղաղ շրջաններից մեկում, ընդ որում՝ սպանվածներից չորսն ազգականներ են եղել:
Ըստ ոստիկանության նախնական տվյալների՝ նրանցից մեկը սպանել էր մյուս չորսին, որից հետո ինքնասպան էր եղել:
Սակայն կիրակի ոստիկանությունը 5 մարդու սպանության մեղադրանքով ձերբակալել է 35-ամյա Բին Տհայ Լյուկին (Binh Thai Luc):
Սպանվածների անձը դեռ չի ճշտվել: Սպանության պատճառները նույնպես անհայտ են:
Ըստ ոստիկանության՝ սպանվածներից առնվազն երկուսի մարմինների վրա հրազենային վերքեր են հայտնաբերվել: Վերջնական եզրակացությունները կանի բժշկական փորձաքննությունը:
Սպանության դրդապատճառները ճշտվում են: Հետաքննությամբ զբաղվում է մոտ 40 քննիչ:
Կիրակի Բին Տհայ Լյուկի հետ ձերբակալվել է նաև նրա կրտսեր եղբայրը՝ Բրայան Լյուկը, որը կասկածվում է թմրանյութերի և զենքի թրաֆիքինգի մեջ: Երկու եղբայրներն ապրում էին միասին:
Հանցագործության մասին ուրբաթ ոստիկանությանը տեղեկացրել էր մի կին, որը բնակարանում հայտնաբերել էր սպանվածներից մեկին, որից հետո էլ ևս երկուսին՝ ավտոտնակում: Դեպքի վայր ժամանած ոստիկանության աշխատակիցները տանը հայտնաբերել էին ևս երկու դիակ:
