Թեղուտում հանքավայրի շահագործման դեպքում կսակավանան ջրային պաշարները, «Առաջին լրատվական»-ի հետ զրույցում նման տեսակետ հայտնեց ջրաբան Քնարիկ Հովհաննիսյանը`խոսելով Թեղուտի հանքավայրի շահագործման նախագծի և դրա բացասական հետևանքների շուրջ:
Նա նշեց, որ Թեղուտում հանքավայրի շահագործման դեպքում կզրկվենք ջրագոյացման գոտուց, այսինքն` կպակասեն, կսակավանան Հայաստանի ջրային պաշարները, կխախտվի ջրային հաշվեկշիռը, որը մենք ունեցել ենք, իսկ եթե դա խախտվի, կխախտվի նաև ջրատնտեսական հաշվեկշիռը: Ջրաբանի խոսքով` երբ ունենանք սակավաջրություն, չենք կարողանա բավարարել բոլոր սպառողների պահանջները: Նա մտավախություն հայտնեց, որ կխախտվի ջրային հաշվեկշիռը, մակերևութային հոսքը կպակասի դրա հաշվին, քանի որ այդտեղ չի լինի ջրագոյացման գոտի:
Անդրադառնալով պոչամբարներին` նա ասաց, որ պոչամբարներից ներքև հոսող ջուրը, որը դուրս է գալիս, կվերցնեն, պարզված ջուրը կվերադարձնեն արտադրամաս, որպեսզի այդտեղ ջրի քիչ ծախս լինի: «Ես վախենում եմ, որ պոչամբարից կեղտաջրերը կթափվեն ստորգետնյա ջրավազան: Երբ մենք դատարկում ենք սարերի թեք լանջերը, երբ չկա մակերևութային հոսքը, այդ լանջերը ենթարկվում են քամու և ջրի էրոզիայի: Բերրի հողի շերտը ջրի, քամիների ազդեցությամբ սահում է ներքև, այսինքն` մերկացվում են ապարները, որոնք ծածկում են սարը: Ուստի մենք չենք կարողանա օգտագործել այդ տարածքները, որոնք հիմա օգտագործվում են ծառատունկ կատարելու, ցորեն ցանելու համար, մենք կզրկվենք մեր հողից և կարող ենք այդքանը մեր հողային բալանսից հանել»,- մեկնաբանեց Ք. Հովհաննիսյանը`հավելելով, որ բերրի հողը իջնելու է ներքև և Շնող գետով, որը Դեբեդի վտակն է, գնալու է Դեբեդ գետ`ավելացնելով պղտորությունը, որից կարող են բողոքներ լինել Վրաստանում:
Հիշեցնենք, որ մարտի 23-ին Վանաձորում տեղի էր ունեցել Թեղուտի նախագծի հանրային լսումները, որը կազմակերպվել էր ՀՀ վարչապետ Տիգրան Սարգսյանի հանձնարարությամբ ստեղծված աշխատանքային խմբի կողմից: Լսումներին մասնակցել են նախարարությունների, գերատեսչությունների, հասարակական և միջազգային կազմակերպությունների շուրջ 70 ներկայացուցիչներ: Ք. Հովհաննիսյանի փաստմամբ` քննարկումն անցել է լավ մթնոլորտում, և հույսեր կան, որ բնապահպանների հնչեցրած մտավախությունները անարձագանք չեն մնա:
