Եվրամիությունը` Official Journal of the European Union-ը, հրապարակել է բելառուսցի այն գործարարների անունները և ընկերությունների անվանումները, որոնք կենթարկվեն պատժամիջոցների: Սահմանափակումները ենթադրում են հաշիվների սառեցում և ԵՄ անդամ երկրներ մուտք գործելու արգելք:
«Սև ցուցակի» մեջ է 12 մարդ, այդ թվում` երկու խոշոր բելառուսցի գործարար` Յուրի Չիժը և Անատոլի Տերնավսկին: ԶԼՄ-ների տվյալների համաձայն` գործարարներից մեկը ֆինանսավորում է Ալեքսանդր Լուկաշենկոյի վարչակազմը, իսկ մյուսը նրա ընտանիքի մտերիմ մարդկանցից մեկն է:
Սև ցուցակի մեջ են հայտնվել նաև դատական համակարգի ներկայացուցիչներ, Հետախուզական դաշնային բյուրոյի բարձրաստիճան պաշտոնյաներ, N17 ուղղիչ գաղութի ղեկավարությունը: ԵՄ-ի կարծիքով` այդտեղ անարդարացիորեն պահվում են քաղբանտարկյալներ:
Պատժամիջոցներ են ընդունվել նաև ընդդեմ 29 ընկերությունների, որոնց շարքում է բելառուսցի միլիարդատեր Վլադիմիր Պաֆտիևի կազմակերպությունը:
Այն մասին, որ ԵՄ-ն պատրաստվում է պատժամիջոցներ կիրառել բելառուսցի գործարարների դեմ, հայտնի է դարձել այս տարվա սկզբին: Կողմերի միջև դիվանագիտական հարաբերությունները շարունակում են մնալ լարված:
