ԵՄ-ն նախ պետք է ՀԿ-ների հե՞տ երկխոսի

Նոյեմբերի 9-10-ը Եվրահանձնաժողովի նախաձեռնությամբ Երեւանում նախատեսված է անցկացնել ԵՄ-Հայաստան քաղաքացիական հասարակության սեմինար` նվիրված մարդկանց արդար դատավարության իրավունքին եւ դատական մարմինների անկախությանը: Սեմինարին մասնակցելու են քաղաքացիական հասարակության ներկայացուցիչներ, իրավաբաններ, փաստաբաններ, գիտնականներ Հայաստանից եւ Եվրամիությունից: Մի շարք հասարակական կազմակերպությունների ղեկավարներից փորձեցինք տեղեկանալ, թե նրանք հրավիրվա՞ծ են սեմինարին եւ մասնակցելու դեպքում ի՞նչ հարցեր են պատրաստվում այնտեղ արծարծել: Հելսինկյան քաղաքացիական ասամբլեայի համանախագահ Նատալյա Մարտիրոսյանը հրավեր չի ստացել եւ տեղեկացված էլ չէր, որ մասնակցելու համար պետք էր դիմել, քանի որ պաշտոնական հայտարարություն չի եղել: «Իրավունքի եւ ազատության կենտրոնի» ղեկավար Վարդան Հարությունյանը նշեց, որ ինքը հրավեր չի ստացել, հրավիրված չի եղել նաեւ ԵԽ ֆորումին: «Հասարակությունն ընդդեմ ահաբեկչության» ՀԿղեկավար Տիգրան Հակոբյանը մասնակցության համար չի դիմել, ուստիեւ` հրավիրված չէ: Փոխարենը` «Քաղաքացիական հասարակության ինստիտուտ» ՀԿ ղեկավար Արման Դանիելյանը դիմում է հղել, սակայն դեռ հրավեր չի ստացել: «Թրանսփարենսի ինթերնեշնլ» ՀԿ ներկայացուցիչ Սոնա Այվազյանը տեղյակ չէր նույնիսկ, թե ինչ սեմինարի մասին է խոսքը: Սեմինարի մասին իրազեկված չէր նաեւ Գյումրիի «Ասպարեզ» ժուռնալիստների ակումբի նախագահ Լեւոն Բարսեղյանը: Մեր զրուցակիցներից սեմինարին մասնակցելու հրավեր են ստացել միայն Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը եւ «Համագործակցություն հանուն ժողովրդավարության» ՀԿ ղեկավար Ստեփան Դանիելյանը: