«ԿԸՀ ներկայացրած ՕԵԿ-ի` 178 հոգուց բաղկացած համամասնական ցուցակը, համեմատած կուսակցության 15-ամյակին նվիրված միջոցառման ժամանակ՝ Քոչարիի ներքո ներկայացված նախնական տարբերակի հետ, էական փոփոխությունների է ենթարկվել»- գրում է «Երկիր»-ը և հավելում.
«Թե ինչո՞ւ է ՕԵԿ-ի ցուցակը էական փոփոխություններ կրել, ՕԵԿ-ից պարզել չհաջողվեց. «Երկիր»-ի հետ չեն խոսում: Մեզ հասած տեղեկությունների համաձայն, սակայն, հարցը շատ կտրուկ են դրել ՕԵԿ փոխնախագահ Մհեր Շահգելդյանը և ՕԵԿ-ական պատգամավոր Խաչիկ Հարությունյանը:
Շահգելդյանը հիշեցրել է, որ երբ ցուցակի եռյակում չեղավ` աղմուկ չբարձրացրեց, բայց հիմա պատրաստ է անգամ դուրս գալ ՕԵԿ-ից, եթե իր հանդեպ վերաբերմունքը չփոխվի:
Նշենք, որ ԿԸՀ ներկայացրած ցուցակում Մհեր Շահգելդյանը 6-րդ հորիզոնականում է, իսկ կուսակցության տարեդարձի օրը հրապարակված ցուցակում` 11-րդը: Խաչիկ Հարությունյանն էլ 9-րդ հորիզոնականից բարձրացել է 5-րդ հորիզոնական:
Ցուցակից դժգոհ է նաև ՕԵԿ մամուլի խոսնակ Սուսաննա Աբրահամյանը, ով արդեն իսկ հրաժարական է տվել և, ամենայն հավանականությամբ, առաջիկայում դուրս կգա նաև կուսակցությունից»:
