Սիրիայի ընդդիմադիր ուժերի ներկայացուցիչները ՅՈՒՆԵՍԿՕ-ին կոչ են արել անհապաղ միջոցներ ձեռք առնել պատմական հուշարձանները կառավարական զորքերի ավերիչ գործողություններից պաշտպանելու համար:
«Բաշար Ասադի դաժան վարչակարգը ոչ միայն մարդկային կյանքեր է խլում, այլ նաև ոչնչացնում է Սիրիայի մշակութային ժառանգությունը` ռմբակոծելով մզկիթները, պալատները և հին շինությունները»,- հայտարարել են ընդդիմադիրները: Այս մասին տեղեկացնում է Associated Press-ը։
Ըստ ընդդիմադիրների՝ կառավարական ուժերն ավերել են Դերաա քաղաքում գտնվող Օմարի մզկիթը, ինչպես նաև՝ Հոմսում գտնվող Սուրբ Էլիանայի եկեղեցին:
Հիշեցնենք, որ մարտի 9-ին ՅՈՒՆԵՍԿՕ-ի գործադիր խորհուրդը դատապարտել էր պաշտոնական Դամասկոսին՝ Սիրիայում բռնությունների և «մարդու իրավունքների կանոնավոր ոտնահարման» համար: Համապատասխան բանաձևն այսօր Փարիզում հաստատվել է հանդիպման մասնակիցների մեծ մասի կողմից:
Բանաձևը քննարկման է ներկայացվել արևմտյան տերությունների և Պարսից ծոցի արաբական մի շարք պետությունների նախաձեռնությամբ: Ի սկզբանե քննարկվում էր նաև Սիրիային ՅՈՒՆԵՍԿՕ-ի գործադիր խորհրդին առընթեր հանձնաժողովներից հեռացնելու հնարավորությունը:
«Իրադրությունը Սիրիայում հակասում է ՅՈՒՆԵՍԿՕ-ի հիմնարար սկզբունքներին, հատկապես հիմնարար ազատությունները հարգելու հարցում»,-ասվում է փաստաթղթի նախագծում: Սակայն Սիրիային հանձնաժողովներից հեռացնելու հարցն օրակարգից հանվեց:
Նշենք, որ ավելի վաղ ՄԱԿ-ի մարդասիրական հարցերով հանձնակատար Վալերի Ամոսը, ով այցով գտնվում էր Սիրիայում, Դամասկոսից Հոմս էր գնացել: Ինչպես հաղորդում է ՄԱԿ-ի Նորությունների կենտրոնը, Ամոսը ցնցված էր Հոմսում ավերածություններից և անհանգստացած էր բնակիչների համար։
