ՀՀ ԱԺ հասարակայնության և տեղեկատվության միջոցների հետ կապերի վարչությունը տեղեկացնում է, որ ՀՀ Ազգային ժողովի նախագահ Սամվել Նիկոյանը մարտի 23-ին մասնակցել է «Դեպի ազատ և թափանցիկ ընտրություններ» կոնֆերանսին: Իր ելույթում պարոն Նիկոյանը ներկայացրել է Ընտրական օրենսգրքի կիրառման նկատմամբ հասարակական մոնիթորինգի գործառույթներ իրականացնող խորհրդակցական աշխատանքային մարմին ստեղծելու առաջարկը: Ելույթում ԱԺ նախագահը նշել է.
«Առաջիկա ընտրությունների նախաշեմին մասնակիցների այսպիսի կազմով և նման թեմայով կոնֆերանսի անցկացումը ոչ միայն ողջունելի է, այլև արձանագրում է այդ ընտրությունների կարևորության գիտակցումը և ուշադրությունը Հայաստանի իշխանությունների ու հասարակական -քաղաքական կյանքի մասնակիցների, ինչպես նաև միջազգային կառույցների ու կազմակերպությունների կողմից:
Այս տարվա փետրվարի 15-ին անցկացված խորհրդարանական լսումների ժամանակ, կարևորելով այն հանգամանքը, որ բոլորիս ցանկությունն ու նպատակն ազատ ու արդար ընտրություններն են, արժևորելով առաջիկա ընտրությունների մեծ նշանակությունը մեր երկրի համար,ես առաջարկեցի առաջիկա ընտրական գործընթացներին մասնակցելու մտադրություն ունեցող խորհրդարանական և արտախորհրդարանական քաղաքական ուժերի, դիտորդական առաքելության իրավունք ունեցող հասարակական և մյուս կազմակերպությունների մասնակցությամբ Ազգային ժողովի նախագահի իրավասության շրջանակներում ստեղծել խորհրդակցական աշխատանքային մարմին /կառույց/, որն Ընտրական օրենսգրքի կիրառման նկատմամբ կիրականացնի հասարակական մոնիթորինգի գործառույթներ»:
