Ֆրանսիայում կոչեր են հնչում քննություն անցկացնել՝ կապված հատուկ ծառայությունների կողմից «Թուլուզի հրաձիգին» չեզոքացնելու գործողության ժամանակ թույլատրված սխալների հետ:
Մեծ թվով ֆրանսիացիներ կարծում են, որ պետք չէ հանցագործի չեզոքացումով փակել նրա գործը:
Ֆրասիայի նախագահի թեկնածու, Սարկոզիի մրցակից Ֆրանսուա Օլանդն իր հերթին հայտարարել է, որ անհրաժեշտ է պարզել թույլատրված սխալների պատճառը:
Ի պատասխան այդ քննադատությունների՝ Ֆրանսիայի վարչապետ Ֆրանսուա Ֆիյոնը հայտարարել է, որ նախքան Մուհամմադ Մերայի կողմից իրագործված 7 սպանությունները իրենք ոչ մի հիմք չունեին նրան ձերբակալելու համար:
«Մենք կոնկրետ պատճառներ չունեինք Մուհամմադ Մերային ձերբակալելու համար: Մեր երկրում իշխանությունն իրավունք չունի հետևելու մարդուն, եթե նա ոչ ոքի չի վնասել, առանց դրա համար իրավական հիմնավորման: Մենք խստորեն հետևում ենք օրենքին»,- ասել է Ֆիյոնը:
Երկրի ներքին գործերի նախարար Կլոդ Գեանն իր հերթին նշել է, որ իր կարծիքով՝ հատուկ ծառայությունները տվյալ իրավիճակում արել են հնարավոր ամեն բան: Նրա խոսքերով՝ հետախուզությունը և հակահետախուզությունը մեծ թվով հանցագործներ են հայտնաբերում, սակայն ամբողջությամբ կանխել նման «միայնակ գայլերի» կողմից բռնության գործողությունները չափազանց դժվար է:
Հիշեցնենք. 7 մարդու սպանության մեջ մեղադրվող Մուհամմադ Մերան 32 ժամ տևած հատուկ գործողության արդյունքում սպանվել է:
