Թուրքական Star թերթի փոխանցմամբ՝ Թուրքիայի ԱԳՆ-ը արձագանքել է ԱՄՆ կառավարությանը կից կրոնական ազատությունների հատուկ հանձնաժողովի (USCIRF) պատրաստած զեկույցին, որում Թուրքիան ընդգրկվել էր կրոնական ազատությունները սահմանափակող երկրների թվում:
Թուրքիայի ԱԳՆ-ի տարածած հայտարարության մեջ ասվում է. «Ասում են, թե այդ զեկույցը կազմվել է անկախ կառույցի կողմից, սակայն իրականում դա պատրաստել են տարբեր խմբերում ներառված քաղաքական գործիչները: Դա կողմնակալ փաստաթուղթ է»:
Հիշեցնենք, որ USCIRF-ի զեկույցում նշված էր, որ Թուրքիայի կառավարությունը համակարգված ու կոպտորեն սահմանափակում է կրոնական ազատությունները, ինչը վերաբերում է Թուրքիայի բոլոր կրոնական համայնքներին.
«Երկար ժամանակ թուրքական կառավարությունն աշխարհիկության պատրվակով միջոցներ է ձեռնարկել կրոնական համայնքներին լիակատար իրավական կարգավիճակից և կրոնական բոլոր համայնքներին ազատություններից զրկելու ուղղությամբ:
Ոչ մուսուլմանների նկատմամբ գործադրվող այդ քաղաքականությունը հանգեցրեց նրան, որ նրանց հոգևոր ներկայացուցիչների և աղոթավայրերի թիվը նվազեց, իսկ մի շարք դեպքերում էլ նրանք փաստացիորեն անհետացան:
Թուրքիայի կառավարության այդ տևական քաղաքականության շարունակումը սպառնում է նրա կրոնական փոքրամասնությունների համայնքների կենսունակությանն ու գոյությանը: Պետության կողմից խիստ վերահսկման տակ են ընկած հայկական, հունական, ասորական, հրեական համայնքները, կաթոլիկներն ու բողոքականները, ինչպես նաև ալևիները:
Անհանգստացնում է նաև այն, որ թուրքական կառավարությունը միջամտում է փոքրամասնությունների կրոնական գործերին, սոցիալական խտրականություն ու բռնություններ է կիրառում նրանց նկատմամբ: Կառավարությունը վերջին 75 տարիների ընթացքում խլել է նրանց ունեցվածքի մի մասը, այդ թվում՝ նաև դպրոցներ, ձեռնարկություններ, հիվանդանոցներ, մանկապարտեզներ ու գերեզմանոցներ: Այդ ամենը հիմնականում տեղի է ունեցել երեք տարբեր ժամանակաշրջաններում. 1936, 1971 և 1974 թվականներին»:
