ՀՀ կրթության և գիտության նախարարությունը մինչև այս տարվա մարտ ամսվա առաջին շաբաթը կավարտի շուրջ 250 դպրոցներում համակարգչային լսարաններ կազմավորելու ծրագիրը:
«Մենք այս տարի համակարգիչ-աշակերտ հարաբերակցությունը կհասցնենք նվազագույնի` մեկը քսանհինգի դիմաց, և գրեթե կհասնենք Եվրամիության անդամ երկրների միջին ցուցանիշին: Համաշխարհային բանկի շնորհիվ իրականացվող ծրագրի շրջանակներում այս տարի ավագ դպրոցներին կմատակարարվի շուրջ 700 համակարգիչ: Մեր կանխատեսումով, այս տարվա ընթացքում 3200 համակարգչով կհամալրվեն հանրակրթական դպրոցների համակարգչային կարողությունները»,- նշեց ՀՀ ԿԳ նախարարը:
Մինչև 2011 թ. օգոստոսի 1-ը, ՀՀ կրթության և գիտության նախարարի որոշմամբ, կբեռնաթափվեն միջին դպրոցում հիմնական առարկաների ծրագրերը. «Քանի որ ծնողական և մասնագիտական հանրույթից ծրագրերի գերբեռնվածության, դժվարությունների և ոչ մատչելի լինելու հետ կապված դժգոհությունները շատ են, մենք այս տարի միջին դպրոցում հիմնական առարկաների ծրագրերը կբեռնաթափենք 15-20 տոկոսով, ինչը թույլ կտա ավելի մատչելի դարձնել հանրակրթական ծրագիրը տվյալ դասարաններում, տվյալ առարկաներից: Այս աշխատանքներում մեզ կօգնի Եվրոպայի խորհուրդը»:
ՀՀ ԿԳ նախարարությունը այս տարի նախատեսում է իրականություն դարձնել նաև մանկավարժների ատեստավորման ծրագիրը: «Մանկավարժների 20 տոկոսը այս տարի մեր ծրագրավորած ցուցանիշով կատեստավորվի, ըստ իրենց մասնագիտական հմտությունների՝ կստանա համապատասխան տարակարգը և, կառավարության կողմից ընդունված համապատասխան կարգին համաձայն, կստանա նաև հավելավճար` աշխատավարձի ավելացում»,-նշեց Արմեն Աշոտյանը:
Նախարարի խոսքերով, կշարունակվեն նաև սոցիալական ոլորտում կատարվելիք աշխատանքները. «Վայոց ձորում կիրականացվի պիլոտային ծրագիր՝ ընտանեկան ծրագրում ընդգրկված անապահով ընտանիքների երեխաներին անվճար հագուստով և կոշիկով ապահովելու ծրագիրը. շուրջ 2000 երեխայի անվճար կտրամադրվի դպրոցական հագուստ: Կա նաև դասագրքերով ապահովման խնդիրը: Ոչ այնքան վճարունակ ընտանիքների երեխաները միշտ չէ, որ կարողանում են մուծել և ստանալ համապատասխան դասագիրքը` ըստ գործող կարգի: Այս տարի 120 մլն դրամ է նախատեսված այդ ընտանիքների երեխաներին դասագրքերով անվճար ապահովելու համար։ Ծրագիրը իրականացվում է մարզպետարանների և Երևանի քաղաքապետարանի հետ մեկտեղ»:
